საქართველოს საგარეო საქმეთა სამინისტროს ევროპის დეპარტამენტის დირექტორის მოადგილემ რუსუდან ფაცაციამ 2024 წლის დეკლარაციაში საკუთარი უძრავი ქონება, ხელფასი და შვილის უძრავი ქონება არ მიუთითა. ამის შესახებ "საერთაშორისო გამჭვირვალობა - საქართველოს" კვლევაში ვკითხულობთ.

კერძოდ, საქმე ეხება ზუგდიდში, სოფელ ინგირში 5503 კვ.მ. ნაკვეთს და მასზე არსებულ 578.3 კვ.მ. შენობა-ნაგებობებას, თბილისში ილია ჭავჭავაძის გამზირზე, N7 და N39-ში არსებულ ბინებსა და ავტოფახებს, გრიგოლ ფერაძის ქუჩა, N20ა-ში 1199 კვ.მ. ნაკვეთსა და 469.6 კვ.მ. შენობა-ნაგებობებს.

გარდა ამისა, ორგანიზაცია წერს, რომ რუსუდან ფაცაციამ დეკლარაციაში არ ასახა თანამდებობაზე ყოფნის პერიოდში მის მიერ წლის განმავლობაში მიღებული შრომის ანაზღაურება.

"მან, ასევე, არ მიუთითა საკუთარი შვილის, ნიკა წყაროზიას, უძრავი ქონება:

ზუგდიდის მუნიციპალიტეტი, სოფელი ინგირი - 2300 კვ.მ. ნაკვეთი
ზუგდიდის მუნიციპალიტეტი, სოფელი ინგირი - 4907 კვ.მ. ნაკვეთი
ზუგდიდის მუნიციპალიტეტი, სოფელი ინგირი - 2802 კვ.მ. ნაკვეთი", - განმარტავს TI.

"საერთაშორისო გამჭვირვალობა - საქართველო" მიმართავს ანტიკორუფციულ ბიუროს შეისწავლოს რუსუდან ფაცაციას დეკლარაციაში გამოვლენილი დარღვევები და მოახდინოს კანონის შესაბამისი რეაგირება. 



ფოტო: საერთაშორისო გამჭვირვალობა-საქართველო