დღეს, 21 მარტს მსოფლიო დაუნის სინდრომის საერთაშორისო დღეს აღნიშნავს. მისი მიზანია საზოგადოების ცნობიერების ამაღლება დაუნის სიდრომის მქონე ადამიანთა მხარდაჭერად და მათი უფლებების ადვოკატირება.

2025 წელს ამ დღის გზავნილია - „გააუმჯობესე ჩვენი მხარდამჭერი სისტემები“.

დაუნის სინდრომი, ცნობილი ასევე, როგორც ტრისომია 21, ყველაზე გავრცელებული გენეტიკური მდგომარეობაა. იგი განპირობებულია ქრომოსომათა რაოდენობის ცვლილებით და უკავშირდება დამატებითი ქრომოსომის არსებობას 21-ე წყვილ ქრომოსომაში. სწორედ 21-ე ქრომოსომის ტრისომიის უნიკალურობის ხაზგასმა გახდა დაუნის სინდრომის მსოფლიო დღის აღსანიშნად წლის მე-3 თვის 21-ე დღის არჩევის მიზეზი.

დაუნის სინდრომის მსოფლიო დღე გაერთიანებული ერების ორგანიზაციის ეგიდით 2011 წლის 10 ნოემბერს დაწესდა. თარიღი სიმბოლურადაა შერჩეული, რადგან რიცხვი 21-ე ქრომოსომას აღნიშნავს, მესამე თვე კი ქრომოსომის გასამებას.