პარტიამ „თავისუფალი საქართველო“ წინასაარჩევნო კამპანია სოფელ ჯიხაშკარში პირველი პრეზიდენტის საფლავისთვის პატივის მიგებით დაიწყო. კახა კუკავასა და ელიზბარ ჯაველიძის თანხლებით პარტიის ზუგდიდის ოფისის წარმომადგენლები რეზო ზარანდიას სახლში მივიდნენ და ზვიად გამსახურდიას საფლავთან  სიტყვა წარმოსთქვეს. პარტიის ერთ–ერთი ლიდერის კახა კუკავას განცხადებით, “თავისუფალი საქართველოს“ მცდელობა მიმართულია იმისკენ, რომ ქართული პოლიტიკა დაუბრუნდეს იმ საწყისებს, სადაც ზვიად გამსახურდია ხელოვნურად გააჩერეს. „ეროვნული და მართლმადიდებლური ფასეულობები, რომლისთვისაც ზვიად გამსახურდია და  მერაბ კოსტავა იბრძოდნენ საქართველოს ხვალინდელი დღეა“ – განაცხადა კახა კუკავამ. მწერალ ელიზბარ ჯაველიზის თქმით, ზვიად გამსახურდიამ განვლო მოწამეობრივი გზა და შესძლო საქართველოს გათავისუფლება. „ საქართველოს მრავალი წამებული ჰყავს და ზვიად გამსახურდია არის ერთ–ერთი დიდი წამებული.მე ვეამბორე მის საფლავს , ჩემთვის დიდი პატივია დღეს აქ ყოფნა“– განაცხადა მან.