არასამთავრობო ორგანიზაციებმა ბავშვზე ზრუნვის ალტერნატიული მომსახურებების საჭიროებათა კვლევა წარადგინეს 25 ივლისს, ზუგდიდში არასამთავრობო ორგანიზაციებმა „ევრიჩაილდ საქართველო“ და „მიმღებ მშობელთა ორგანიზაციამ“ ბავშვზე სახელმწიფო ზრუნვის ალტერნატიული მომსახურებების - მინდობით აღზრდის, მცირე საოჯახო ტიპის სახლებისა და დღის ცენტრების საჭიროებათა კვლევის შედეგები წარადგინეს.კვლევა ევროკავშირის დაფინანსებით ბრიტანული არასამთავრობო ორგანიზაცია „ევრიჩაილდის“ მიერ განხორციელებული პროექტისფარგლებში ჩატარდა, რომლის მიზანია ბავშვთა უფლებების დაცვის საკითხებში ალტერნატიული მომსახურებების მიმწოდებელი ორგანიზაციების/პირების და მომხმარებელთა (როგორც ბავშვების, ასევე მათი ბიოლოგიური მშობლების) ჩართულობის ხელშეწყობა. კვლევა განახორციელა პროექტის პარტნიორმა ორგანიზაციამ „საქართველოს ბავშვები“. საჭიროებათა კვლევამ აჩვენა, რომ მომსახურების მიმწოდებლები და მომხმარებლები ზოგადად კმაყოფილები არიან არსებული მომსახურებით და მხარს უჭერენ ქვეყანაში მათ არსებობას. თუმცა, მათ დაასახელეს მთელი რიგი საჭიროებები, რომელთა დაკმაყოფილებაც აუცილებელია, რათა ბავშვებისათვის მიწოდებული მომსახურება უფრო მრავალფეროვანი და ხარისხიანი გახდეს. შემუშავებული 70 რეკომენდაციიდან ერთი უკვე შესრულდა, ხოლო 20 განხორციელების პროცესის სხადასხვა ეტაპზე იმყოფება. თუმცა, რჩება კიდევ 49 რეკომენდაცია, რომელიც ყურადღებას საჭიროებს. ეს პირველი საჭიროებათა კვლევაა რომელმაც ბავშვზე ზრუნვის სამივე სახის ალტერნატიული მომსახურება მოიცვა. ალტერნატიული მომსახურებებით, რომელთაც სახელმწიფოსთან ერთად რამდენიმე არასამთავრობო ორგანიზაცია ახორციელებს, ბავშვთა კეთილდღეობის რეფორმის ფარგლებში მიმდინარე დეინსტიტუციონალიზაციის პროცესში მშობლის მზრუნველობამოკლებული ბავშვები სარგებლობენ. “მიმღები მშობლების, მცირე საოჯახო ტიპის სახლებისა და დღის ცენტრების მომსახურების მიმღებების აქტიური ჩართულობა სახელმწიფო სამოქმედო გეგმების შემუშავების პროცესში უზრუნველყოფს შემდეგი წლის ბიუჯეტში რეალური საჭიროებების უფრო შესაბამისად ასახვას. ამგვარი ჩართულობის მექანიზმების ჩამოყალიბება ხელს შეუწყობს დაგეგმვის პროცესის გამჭვირვალობას და ინფორმაციის რეგულარულ გაცვლა-გამოცვლას იმისათვის, რომ ბავშვთა უფლებები შესაბამისად იყოს დაცული.” - განაცხადა „ევრიჩაილდი“-ს დირექტორმა, ანდრო დადიანმა. პრეზენტაციაზე, "რომელიც დემოკრატიული ჩართულობის ცენტრში" გაიმართა, მოწვეულები იყვნენ ადგილობრივი თვითმმართველობის, შესაბამისი სახელმწიფო დაწესებულებებისა და სააგენტოების, ბავშვთა კეთლდღეობაზე მომუშავე ადგილობრივი ირგანიზაციებისა და რეგიონული მასმედიის წარმომადგენლები.