შოთა მესხიას სახელობის სასწავლო უნივერსიტეტში სამეგრელო-ზემო სვანეთის მხარეში სახელმწიფო რწმუნებულმა-გუბერნატორმა ლევან შონიამ უახლესი ტექნიკით აღჭურვილი კრიმინალისტიკური ლაბორატორია გახსნა.  ღონისძიებას სამეგრელო-ზემო სვანეთის სამხარეო პოლიციის საექსპერტო-კრიმინალისტური სამსახურის უფროსი მანუჩარ კუპრავა დაესწრო. ლაბორატორიის გახსნის შემდეგ გუბერნატორმა უნივერსიტეტი დაათვალიერა, შემდეგ ლევან შონია სტუდენტებს შეხვდა და მათი ინიციატივები და პრობლემები მოისმინა.  შეხვედრაზე სტუდენტებმა მთავარ  პრობლემად მუნიციპალურ ტრანსპორტზე შეღავათების არარსებობა დაასახელეს და გუბერნატორს მისი მოგვარება სთხოვეს.„პირადად ავიყვან ამ საქმეს კონტროლზე და გპირდებით, რომ ამ პრობლემას მოგიგვარებთ“ ,-თქვა ლევან შონიამ და აღნიშნა, რომ სტუდენტებს მგზავრობაზე შეღავათები აუცილებლად უნდა ჰქონდეთ.  მხარის გუბერნატორმა სტუდენტებს ურჩია განცხადებით ადგილობრივი თვითმმართველობისთვის და რწმუნებულის აპარატისთვის მიემართათ. მხარის გუბერნატორმა სტუდენტების დასაქმების პერსპექტივებზე ისაუბრა. მისი თქმით,სტუდენტებს რეგიონში მსხვილი პროექტების დაწყებისთანავე მუშაობის შესაძლებლობა მიეცემათ. ლევან შონია სტუდენტებს  გაცვლით პროგრამებში ჩართვასაც დაჰპირდა. გუბერნატორმა სტუდენტებთან შეხვედრის დროს მათ ბიზნეს პროექტების მომზადებაც ურჩია - „აუცილებლად იქნება წელს ანაკლიაში ფესტივალი, როგორ და რა სახით ამას მომავალში გავახმოვანებთ, მაგრამ აუცილებელია თქვენი ჩართულობა, მოამზადეთ ბიზნეს პროექტები და გექნებათ შანსი განახორციელოთ თქვენი იდეები, საშუალება გექნებათ ასევე ჩაატაროთ სხვადასხვა სახის ფესტივალები და ამ ყველაფერში ჩვენ შეგიწყობთ ხელს,-“ ამბობს ლევან შონია. გუბერნატორმა უნივერსიტეტის საერთო საცხოვრებლის სამშენებლო სამუშაოებიც დაათვალიერა, რომელიც პრემიერ-მინისტრის ინიციატივით შენდება.