საქართველოს რეგიონული განვითარებისა და ინფრასტრუქტურის სამინისტროს წარმომადგენლებმა, მინისტრის პირველი მოადგილის თენგიზ შერგელაშვილის ხელმძღვანელობით დღეს ზუგდიდში სამუშაო შეხვედრა გამართეს. შეხვედრა, სამხარეო ადმინისტრაციის შენობაში, სამინისტროს მიერ შემუშავებული რეგიონული განვითარების რეფორმის მხარდაჭერის ფარგლებში გაიმართა. შეხვედრას სამეგრელო-ზემო სვანეთის გუბერნატორი თენგიზ გუნავა ესწრებოდა. აქვე იმყოფებოდნენ ადგილობრივი თვითმმართველობის წარმომადგენლები. UNDP-ისა და GIZ-ის ადგილობრივი ექსპერტები. შეხვედრაზე რეგიონული განვითარების სტრატეგიის მომზადების პროცედურებზე ისაუბრეს. რეგიონის განვითარების სტრატეგიაზე სამინისტროს წარმომადგენელმა კოტე ხმალაძემ განაცხადა, რომ რეგიონში აუცილებელია აგრარული სექტორის განვითარება, სოციალური საკითხებისთვის ყურადღების დათმობა და ახალი სამუშაო ადგილების შექმნა. ასევე მიგრაციული პროცესების ანალიზი და მცირე ბიზნესის განვითარება. აქვე გამოკვეთა რეგიონული განვითარების საბჭოს სამუშაო ჯგუფების ახალი შემადგენლობის შექმნის აუცილებლობა. ჯგუფის ხელმძღვანელად გამგებლის მოვალეობის შემსრულებელი ედიშერ თოლორაია შეირჩა, რომელიც შეხვედრას არ დასწრებია. შეხვედრაზე პრიორიტეტული პროექტების სახით 3 მიმართულება განისაზღვრა: სოფლებში წყლის პრობლემის მოგვარება, გზების ინფრასტრუქტურა და ნაპირსამაგრითი სამუშაოების ჩატარება. მინიტრის პირველმა მოადგილემ თენგიზ შერგელაშვილმა მედიასთან საუბარში განაცხადა, რომ საქართველოში 2013 წელს 180 მილიონი ინფრასტრუქტურული პროექტი მხოლოდ სამინისტროს ხაზით განხორციელდება. მან ასევე ლაზიკის თემაზე ისაუბრა და აღნიშნა, რომ ლაზიკის როგორც ქალაქის მშენებლობა პრიორიტეტებში არ შედის, მაგრამ ადგილზე ნავსადგურის მშენებლობის პროექტი შეიძლება განხილულ იქნას. შეხვედრის შესახებ კომეტარი გააკეთა სამეგრელო-ზემო სვანეთის გუბრენატორმა თენგიზ გუნავამ. მან რეგიონული შეხვედრა დადებითად შეაფასა და აღნიშნა, რომ ანაკლიის საკითხი შესწავლის პროცესშია.