ზუგდიდის მუნიციპალიტეტის სოფელ ახალკახათში ადგილობრივებმა საპროტესტო აქცია გამართეს. ისინი ხელისუფლებისგან თხილის ზარალის ანაზღაურებას ითხოვენ. მოსახლეობის თქმით, მათ ადგილობრივი ხელისუფლება დახმარებას დაჰპირდა, თუმცა პირობა დღემდე შეუსრულებელი დარჩა. „როდესაც ძლიერი ქარი იყო, რამდენიმე დღეში მოვიდნენ  და აღწერეს ზარალი, გვითხრეს აგინაზღაურდებათო. თხილი ჩვენი შემოსავლის ძირითადი წყაროა, ეს არის ჩვენი საჭმელი, სასმელი და ყველაფერი“, - თქვა ახალკახათის მკვიდრმა ელენე აბსანძემ. აქციის მონაწილეებს შორის იყვნენ ის ფერმერები, რომლებსაც თხილის მოსავალი სხვადასხვა სადაზღვევო კომპანიებში ჰქონდათ დაზღვეული. მათი თქმით, კომპანიებს ზარალი ჯერ არ აუნაზღაურებიათ, თუმცა ისინი თანხის მიღებას მიმდინარე თვის ბოლოს ელოდებიან. „ტყუილს ვერ ვიტყვი, კმაყოფილები ვართ სადაზღვევო კომპანიის მომსახურებით, მაგრამ ახლა თანხის მიღება გაჭიანურდა. ახლა დაგვპირდნენ თანხას თვის ბოლოს ჩაგირიცხავთო“, - ამბობს ვეგნერი აბსანძე. აქციის მონაწილეებთან მივიდა „გაერთიანებული დემოკრატების- ერთიანი საქართველოს“ ზუგდიდის ორგანიზაციის ხელმძღვანელი გოგიტა ბიგვავა. ის ადგილობრივებთან ერთად ზარალის ანაზღაურებას ითხოვს, წინააღმდეგ შემთხვევაში, მისი თქმით, ის არ გაჩერდება,  სანამ ხელისუფლება დაპირებას არ შეასრულებს. „ხელისუფლება ამ ხალხს ზარალის ანაზღურებას დაპირდა , მაგრამ ეს მათი ტყული დაპირებების კასკადის გაგრძელება აღმოჩნდა“, - თქვა გოგიტა ბიგვავამ. თავის მხრივ, ზუგდიდის მუნიციპალიტეტის გამგეობაში აცხადებენ, რომ გამგეობის წარმომადგენლებმა თხილის მოსავლის ზარალი ნამდვილად აღწერეს, თუმცა მისი ანაზღაურების პირობა მოსახლეობისთვის არ მიუციათ. „ამ ყველაფერს დაერთო 13 ივნისს თბილისში მომხდარი ტრაგედია. ამის შემდეგ ჩვენგან მორალურად არ იყო გამართლებული ზიანის ანაზღაურება მოგვეთხოვა და მონაცემები თბილისში გადაგვეგზავნა. ამ ტრაგედიის შემდეგ ჩვენთან მოსახლეობა მოდიოდა და გვეუბნეობოდა, ჩვენ არ გვინდა ზიანის ანაზღაურება, თბილისს დაეხმარეთო“, - თქვა გურგენ სართანიამ. მიმდინარე წლის 8 ივნისს ზუგდიდსა და წალენჯიხის მუნიციპალიტეტებში ძლიერმა ქარმა თხილის მოსავლის 35-70% გაანადგურა.