ზუგდიდის მუნიციპალიტეტის გამგეობა დღეიდან ტერიტორიულ ერთეულებში, სოფლის მხარდაჭერის პროგრამის ფარგლებში მოსახლეობასთან შეხვედრებს და სოფლებში კრებების ჩატარებას იწყებს. როგორც რადიო "ათინათს" ზუგდიდის გამგეობის საზოგადოებასთან და მედიასთან ურთიერთობის სამსახურის ბიუროს ხელმძღვანელმა, მაია ღურწკაიამ შეატყობინა, გამგეობის აპარატის წარმომადგენლები ზემოაღნიშნული პროგრამის ფარგლებში შეხვედრებს ახალაბასთუმანში, ოქტომბრის თემში, კონკრეტულად დავითიანის უბანში და სოფელ შამგონაში გეგმავენ. ღურწკაიას განმარტებით შეხვედრის მთავარი მიზანი სოფლებში არსებული პრობლემების გამოვლენა და მათი მოგვარების გზების განსაზღვრაა და დასძენს, რომ ამავე ვიზიტისას მოსახლეობას კომბინირებული სასოფლო-სამეურნეო ბარათები დაურიგდება. შეგახსენებთ, რომ ზუგდიდის მუნიციპალიტეტის გამგეობაში სოფლის მეურნეობის სამინისტროსა და ზუგდიდის მუნიციპალიტეტის განვითარების სამსახურის წარმომადგენლებმა ტერიტორიული ორგანოს რწმუნებულებს ნომინალური სასოფლო–სამეურნეო ბარათები გადასცეს, რითაც ბენეფიციარები სასოფლო–სამეურნეო დანიშნულების საქონლისა და ინვენტარის შეძენას შეძლებენ. ზუგდიდში ნომინალური ბარათების მფლობელებს ექვსი მაღაზია მოემსახურება და უახლოეს პერიოდში მათ რიცხვს კიდევ 4 მაღაზია დაემატება. სათიბი და შესაწამლი აპარატების შეძენა ნებისმიერ მსურველს შეუძლია მაღაზია ,,აგრო–ჯეო–პლუს"–ში.