ზუგდიდის მუნიციპალიტეტის საჯარო სკოლებთან ერთად, ახალი სასწავლო წელი საქართველოს სასწავლო ცენტრის GLC ზუგდიდის განყოფილებაშიც დაიწყო. სასწავლო ცენტრმა, რომელიც ასოციაცია „ათინათის“ ბაზაზე არსებობს, ახალი მოსწავლეები კონკურსის წესით წელსაც მიიღო. GLC-ის სკოლაში მოსწავლეების მიღება მე-7 კლასიდან იწყება. სასწავლო ცენტრის გერმანული ენის მასწავლებლის თინათინ ლოლუას თქმით, GLC-ის სკოლას წელს დიდი გეგმები აქვს და როგორც გასული წელი, ახალი სასწავლო წელიც გამორჩეული იქნება. „ყველა ბავშვი, რომელიც აქ სწავლობს - წარმატებას აღწევს, თუმცა, დიდი შრომის ფასად“, - თქვა თინათინ ლოლუამ. GLC- ის სკოლის სასწავლო ნაწილის მენეჯერის ინგა კეკელიას ინფორმაციით, 2015 წლის გამოშვების სამმა კურსდამთავრებულმა ოქროს მედალი აიღო, ერთმა - ვერცხლის. მისივე თქმით, 6 მოსწავლემ, რომელიც სტუდენტი გახდა,  100%-იანი გრანტი მოიპოვა, ხოლო დანარჩენებმა - 50%  - 70 %-იანი გრანტები. „აქვე შეიძლება ითქვას, რომ GLC-ის სკოლის არც ერთი მოსწავლე სასურველი უნივერსიტეტის მიღმა არ დარჩენილა“, - თქვა ინგა კეკელიამ. სასწავლო ცენტრის GLC ზუგდიდის განყოფილებაში 50-მდე ბავშვი სწავლობს. აქედან თითო კლასში მოსწავლეების რიცხვი 10-ს არ აღემატება, რაც სწავლის ხარისხზე აისახება.