დადიანების ისტორიულ-არქიტექტურულ მუზეუმში დაბრძანებული ღვთისმშობლის შესამოსელის ხობის ხარების დედათა მონასტერში გადატანის საკითხთან დაკავშირებით, ზუგდიდისა და ცაიშის მიტროპოლიტ მეუფე გერასიმეს რეზიდენციასთან საკუთარი პოზიციის დასაფიქსირებლად, ზუგდიდის საზოგადოებრიობის წარმომადგენლები მივიდნენ. მეუფე გერასიმემ შეკრებილებს სიმშვიდისკენ მოუწოდა და საპატრიარქოს განცხადება გააცნო. „ღვთისმშობლის კვართის გადაბრძანებასთან დაკავშირებით, საზოგადოებაში ბუნდოვანი სიტუაცია შეიქმნა მას შემდეგ, რაც ხობის ადგილობრივი ხელისუფლებისა და ინტელიგენციის წარმომადგენლები შეხვდნენ მის უწმინდესობას ყაზბეგში და გაავრცელეს ინფორმაცია, რომ პატრიარქი თანახმა იყო, ეს სიწმინდე ერთი დღით დაბრძანებულიყო ხობის დედათა მონასტერში, მაგრამ არ ითქვა, რომ პროცესს არ უნდა მოჰყოლოდა შფოთი და დაპირისპირება. ბუნებრივია, მისი უწმინდესობა და ეკლესია მხარს ვერ დაუჭერს ასეთ ვითარებაში შესამოსელის გადაბრძანებას, რაც საპატრიარქოს 14 სექტემბრის განცხადებაშიც გარკვევით იყო დაფიქსირებული,“ - ნათქვამია განცხადებაში. გაურკვევლობა აღნიშნულ საკითხთან დაკავშირებით, ერთ-ერთ საეკლესიო ჟურნალში გამოქვეყნებულმა ინფორმაციამ გამოიწვია, რომლის თანახმად, კულტურის სამინისტროს ნებართვით და პატრიარქის ლოცვა-კურთხევით, სიწმინდე ერთი დღით ხობში დაბრძანდებოდა. ადგილობრივმა მრევლმა და საზოგადო მოღვაწეებმა სოციალური ქსელით დაგეგმეს მეუფის რეზიდენციასთან შეკრება. ისინი აცხადებდნენ, რომ თუნდაც ერთი დღით არ დაუშვებენ ზუგდიდიდან სიწმინდის წაბრძანებას. მათივე თქმით, გარკვეულ ძალებს სურთ ეპარქიების, ასევე ხობელებისა და ზუგდიდელების დაპირისპირება. მოსახლეობის აზრით, ეს არის მიზანმიმართული ქმედება და მსგავსი კამპანიის წამომწყები,"არის პატრიარქის, ეკლესიის და ხალხის მტერი“. საპატრიარქოს განცხადების გაცნობის შემდეგ მეუფის რეზიდენციასთან შეკრებილი ხალხი დაიშალა.