არასამთავრობო ორგანიზაცია „საერთაშორისო გამჭირვალობა-საქართველოს“ ორგანიზებით ადგილობრივი თვითმმართველობის ვებ-გვერდების გამჭირვალობასთან დაკავშირებით კვლევა ჩაატარა. გამჭირვალობის ზუგდიდის ბიურომ აღნიშნულ საკითხზე კვლევა სამეგრელო-ზემო სვანეთის მხარეში ჩაატარა. შედეგების პრეზენტაცია ზუგდიდის მუნიციპალიტეტის გამგეობაში ჩატარდა და შეხვედრას სხვადასხვა მუნიციპალიტეტის წარმომადგენლები ესწრებოდნენ. გამჭირვალობის მიერ მომზადებული პრეზენტაციიდან ვიგებთ, რომ ინფორმაციულად დატვირთული ვებ-გვერდი წალენჯიხის და ხობის მუნიციპალიტეტებს აქვთ. გარდა ამისა რამდენიმე სახის პრობლემა გამოიკვეთა, მათ შორისაა საიტის ტექნიკური შესაძლებლობები, ბიუჯეტში თანხების გაუთვალისწინებლობა და მოსახლეობის ინტერნეტზე ხელმიუწვდომლობა. გამჭირვალობამ აღნიშნულ საკითხზე რეკომენდაციები გასცა და აღნიშნა, რომ აუცილებელია მომხმარებლის ინტერესები იქნეს გამოკვლეული და მოსახლეობას ყველა სასურველი ინფორმაცია მუნიციპალიტეტების ვებ-გვერდებიდან მიეწოდოს. წალენჯიხის მუნიციპალიტეტის საზოგადოებასთან ურთიერთობის სამსახურის მთავარი სპეციალისტის ხათუნა ღვინჯილიას განმარტებით, მუნიციპალიტეტის ვებ-გვერდს აქვს ტექნიკური ხარვეზი და რის გამოც მათ საჯარო ინფორმაციის გამოქვეყნებაში ხელი ეშლებათ. ასევე ღვინჯილიას თქმით მათი ადმინისტრაცია აუცილებლად დააყენებს ამ საკითხს და მომავალში პრობლემის გამოსწორებას შეეცდებიან, „საერთაშორისო გამჭვირვალობა საქართველოს“ ზუგდიდის ოფისის წარმომადგენელის არჩილ თოდუას განმარტებით მათ კვლევა ცხრავე მუნიციპალიტეტში ჩაატარეს და კველევის შედეგად გამოვლინდა, რომ არცერთი ადგილობრივი თვითმმართველობის ორგანოები ვებ-გვერდებს სრულყოფილად არ იყენებენ მოქალაქეებთან, მედიასთან და საზოგადოებასთან ურთიერთობისათვის. თოდუა ასევე დასძენს, რომ სასურველია ამ კუთხით მუშაობა თვითმმართველობის ორგანოებმა აქედანვე დაიწყონ რადგან სექტემბრის თვიდან ზოგად ადმინისტრაციულ კოდექსში ცვლილება შედის, რის თანახმადაც მათ ვალდებულება ექნებათ, ყველა საჯარო ინფორმაცია საკუთარ ვებ-გვერდებზე გამოაქვეყნონ.