რამდენიმე დღის წინ, თბილისს, ჰოლივუდის ვარსკვლავი, ბრიტანელი მსახიობი რალფ ფაინსი ეწვია! მსახიობი კოტე მარჯანიშვილის სახელობის სახელმწიფო დრამატულ თეატრს ესტუმრა, სადაც ადგილობრივი სპექტაკლების რეპეტიციას დაესწრო და ხელოვანებს “თბილისის საერთაშორისო თეატრალური ფესტივალის” დაწყება მიულოცა. ბრიტანელი ვარსკვლავი ქართული სტუმართმოყვარეობის ტრადიციებსაც ეზიარა – ეროვნული კინოცეტრის ხელმძღვანელმა, ნანა ჯანელიძემ, მსახიობს შესანიშნავი მიღება გაუმართა. საღამოზე, არაერთი ქართული კერძის დაგემოვნებასთან ერთად, ხელოვანმა ქართული მრავალჟამიერიც მოისმინა, რომელიც არც მეტი, არც ნაკლები, ლეგენდარულმა კახი კავსაძემ ანსამბლ “შავნაბადას” წევრებთან ერთად შეასრულა. ფაინსი საქართველოში “თბილისის საერთაშორისო თეატრალური ფესტივალის” ფარგლებში იმყოფებოდა. მან კინოსამყაროში სახელი ისეთი ლეგენდარული ფილმებით გაითქვა, როგორებიცაა: “შინდლერის სია”, “ინგლისელი პაციენტი”, “ონეგინი”, “გრანდ ბუდაპეშტის სასტუმრო” და სხვები.