ღიმილის საერთაშორისო დღესთან დაკავშირებით, ზუგდიდში, იუსტიციის სახლის მიმდებარე ტერიტორიაზე ღონისძიება გაიმართა, რომელიც ელექტრონული მუსიკის თანხლებით მიმდინარეობდა. "ღიმილის საერთაშორისო დღე" არასამთავრობო სექტორის და ადგილობრივი ხელისუფლების მხარდაჭერით გაიმართა. ორგანიზატორების განცხადებით, ღონისძიების მიზანი ადგილობრივი რესურსების მობილიზებით ახალგაზრდული საღამოების ორგანიზება და პრაქტიკის პოპულარიზაციაა. ღიმილის საერთაშორისო დღეს ყოველწლიურად ოქტომბრის პირველ პარასკევს ზეიმობენ. ამ დღის აღნიშვნა ამერიკელი მხატვრის, ჰარვი ბელის სახელს უკავშირდება. სწორედ მას ეკუთვნის "სმაილის" ლოგო, ყვითელ რგოლში მომღიმარი შავი პირი, რომელიც მხატვარმა შემთხვევით დახატა და შემდეგ მთელს მსოფლიოში ღიმილის სიმბოლოდ იქცა.