სამეგრელო-ზემო სვანეთის მხარეში სახელმწიფო რწმუნებულმა ლევან შონიამ მარტვილში ახალადგახსნილი კერძო სკოლა "სხივი" დაათვალიერა. გუბერნატორმა ბიზნესმენ ალექსანდრე ხურცილავას განათლებაში ჩადებული ინვესტიციისთვის მადლობა გადაუხადა. ორსართულიანი თანამედროვე სტანდარტების სკოლა ახალი ინვენტარითა და ტექნიკით აღიჭურვა, ადაპტირებულია სპეციალური საგანმანათლებლო საჭიროების მქონე ბავშვებისათვის, დამონტაჟდა ცენტრალური გათბობის სისტემა, ინფორმაციული ტექნოლოგიების კაბინეტი, ბიბლიოთეკა, ექიმის კაბინეტი, სააქტო დარბაზები, კეთილმოეწყო ეზო. სწავლების მაღალი ხარისხის მიზნით სკოლა დაკომპლექტებულია სერთიფიცირებული პედაგოგებით. სკოლა 250 მოსწავლეზეა გათვლილი. სკოლაში ამჟამად ევროპული სტანდარტების სპორტული დარბაზის მშენებლობა მიმდინარეობს. ახალი სკოლა გუბერნატორთან ერთად რეგიონული პროექტების კოორდინირების სამსახურის უფროსმა დათო კოდუამ და მარტვილის გამგებელმა ალექსანდრე გრიგალავამ დაათვალიერეს.