მოძრაობა „ეროვნულების“ და ადგილობრივი მთავრობის ინიციატივით, ზუგდიდში პირველი დემოკრატიული საპარლამენტო არჩევნების ჩატარების დღე აღნიშნეს. ადგილობრივი მთავრობისა და საზოგადოების წარმომადგენლები  ზვიად გამსახურდიას ბიუსტთან შეიკრიბნენ და მის ხსოვნას პატივი მიაგეს, რის შემდეგაც გამგეობის შენობასთან გადაინაცვლეს და 25 წლის წინანდელი მოვლენები გაიხსენეს. გამგეობის შენობაზე საქართველოს პირველი პრეზიდენტის ზვიად გამსახურდიას ბარელიეფიც გაიხსნა. ადგილობრივმა ფოლკლორულმა ანსამბლებმა კი ხალხური სიმღერები შეასრულეს. პირველი დემოკრატიული საპარლამენტო არჩევნები 1990 წლის 28 ოქტომბერს ჩატარდა. სწორედ ზვიად გამსახურდიას ხელმძღვანელობით, ეროვნული პოლიტიკური პარტიებისა და ორგანიზაციების საარჩევნო ბლოკმა „მრგვალი მაგიდა-თავისუფალი საქართველო“ დამაჯერებელი გამარჯვება მოიპოვა. არჩევნების შედეგად ქვეყანას ეროვნული პარლამენტი - საქართველოს რესპუბლიკის უზენაესი საბჭო ჩაუდგა სათავეში.