ქალაქ ზუგდიდის მუნიციპალიტეტის ადგილობრივი თვითმმართველობის წარმომადგენლებმა ამომრჩევლთა ნაწილს მუშაობის ანგარიში ჩააბარეს. შეხვედრა სტალინისა და რუსთაველის ქუჩების მცხოვრებლებთან გაიმართა. განხორციელებულ და დაგეგმილ პროექტებზე საკრებულოს თავმჯდომარე მერაბ ქვარაიამ და ქალაქის მერმა ირაკლი გოგოხიამ ისაუბრეს. მათი თქმით, ხელისუფლება წინასაარჩევნო დაპირებებს ასრულებს, თუმცა ყველა პრობლემა ერთბაშად ვერ მოგვარდება. მერმა და საკრებულოს თავმჯდომარემ მოქალაქეებს უთხრეს, რომ კანალიზაციის, 24 საათიანი წყალმომარაგებისა და სხვა აქტუალური ინფრასტუქტურული საკითხები ზუგდიდში უახლოეს წლებში გადაწყდება. თავის მხრივ, მოქალაქეებმა საცხოვრებელი პირობების გაუმჯობესების აუცილებლობასა და დასაქმების პრობლემაზე გაამახვილეს ყურადღება. საჯარო მოხელეებმა ამომრჩევლებს შეხვედრაზე დასწრებისთვის მადლობა გადაუხადეს და თვითმმართველობის საქმიანობაში უფრო მეტი ჩართულობისკენ მოუწოდეს. მსგავსი შეხვედრები მოსახლეობასთან ქალაქის სხვადასხვა უბნებშიც იგეგმება.