ავსტრიელმა რეჟისორმა მიხაელ ჰანეკემ ფილმისთვის „სიყვარული“ ოქროს პალმა დაიმსახურა. ეს მისი მეორე აღიარებაა კინოფორუმის მიერ. მოლოცვების მიღებისას რეჟისორმა მადლობა გადაუხადა მთელ გადამღებ ჯგუფს და მთავარი როლების შემსრულებლებს. მთავარ როლში მყოფი ორივე მსახიობი 80 წელზე მეტისაა. სურათმა ჟიური და მაყურებლები ააცრემლიანა და მათი გულიც მოიგო. „ეს ფილმი სიყვარულის დასასრულზეა,“ - აღნიშნა ჰანეკემ. ჟიურის პრიზი ფესტივალზე წარმოდგენილმა ერთადერთმა კომედიამ მიიღო. ბრიტანელი რეჟისორის კენ ლოუჩის ფილმში „ანგელოზის ხვედრი“ ერთმანეთში შერწყმულია ტრადიციული და რეალური წარმოდგენები შოტლანდიაზე. დანიელმა მედს მიკელსენმა კანის 65-ე კინოფესტივალის ჯილდო მამაკაცის საუკეთესო როლის შესრულებისთვის დაიმსახურა. მან შესანიშნავად ითამაშა ტომას ვინტერბერგის ფილმში „ნადირობა“.