ხობის მუნიციპალიტეტის გამგებელმა კახაბერ ბენიძემ თანამდებობიდან გადადგომიოს შესახებ განცხადება დაწერა. ბენიძის განცხადებით, ის სამუშაოდ თბილისში გადადის. „შემოსავლების სამსახურის ერთ-ერთი სამმართველოს უფროსის მოადგილედ დავინიშნე. სულ ეს არის“, - განუცხადა რადიო „ათინათს“ კახაბერ ბენიძემ. ხობის საკრებულოს თავმჯდომარის მამუკა ქარდავას განცხადებით, კახაბერ ბენიძის განცხადება, ბიურომ უკვე დააკმაყოფილა. მისივე განმარტებით, ამ ეტაპზე ხობის გამგებელს საკონკურსო კომისია ვერ შეარჩევს, რადგან სამოტივაციო-საკონკურსო კომისიის დებულება ჯერ ბოლომდე არ არის შექმნილი. „კანდიდატების განცხადება ბიუროში შემოვა. ბიურო კი შერჩეულ კანდიდატს დასამტკიცებლად საკრებულოს წარუდგენს. ამ ეტაპზე გამგებლის მოვალეობას მახარე ჩოკორაია ასრულებს“, - აცხადებს ხობის საკრებულოს თავმჯდომარე და დასძენს, რომ ხობის მუნიციპალიტეტს ახალი გამგებელი, სავარაუდოდ, მომავალ კვირას ეყოლება. ცნობისთვის, ხობის უკვე ყოფილი გამგებელი კახაბერ ბენიძე კოალიცია „ქართული ოცნების“ მხარდამჭერი იყო და ის გამგებლად საპარლამენტო არჩევნების შემდეგ დაინიშნა.