ზუგდიდის მუნიციპალიტეტის სოფელ ნარაზენის #1 საბაზო სკოლის ყოფილი პედაგოგები და მშობლები სკოლის აღდგენას ითხოვენ. ისინი ამ მოთხოვნით, დღეს, 18 სექტემბერს სკოლის ეზოში შეიკრიბნენ. ნარაზენის #1 საბაზო სკოლა, განათლებისა და მეცნიერების სამინისტროს ბრძანების საფუზველზე, 2006 წელს დაიხურა. პედაგოგების განმარტებით, ამ დროს სკოლაში 73 მოსწავლე ირიცხებოდა. მათივე თქმით, აღნიშნული სკოლა დახურვის შემდეგ ნარაზენის საჯარო სკოლას შეუერთდა. ნარაზენის ყოფილ საბაზო და საჯარო სკოლებს შორის დაახლოებით 7 კილომეტრია. „საჯარო სკოლა აქედან ძალიან შორსაა. სკოლის სამარშუტო ტაქსი ვითომ დადის. ეს მიკროავტობუსი კვირაში 2-ჯერ თუ გამოივლის. ვითხოვთ აქ ისევ საბაზო სკოლა გაიხსნას“, - ამბობს ნარაზენის მკვიდრი გოგოლა აფაქიძე. ამჟამად, ყოფილი საბაზო სკოლის შენობაში ორი კლას-კომპლექტი ფუნქციონირებს, სადაც 13 ბავშვი სწავლობს. საბაზო სკოლის ყოფილი პედაგოგები ამბობენ, რომ სკოლის აღდგენის მოთხოვნით არაერთხელ მიმართეს სხვადასხვა უწყებას, თუმცა უშედეგოდ. „დაუბრუნდეს ამ უბანს თავისი სკოლა, თუნდაც ეს 6 კლასი იყოს. ეს სკოლა უბნისთვის სულიერი წყარო იყო. და თუ სახელმწიფოსთვის სოფელი პრიორიტეტულია ეს სკოლა უნდა აღდგეს. ამასთან, თითო-ოროლა პედაგოგი, რომელიც სკოლის გარეთ არის დარჩენილი დასაქმდება“, - უთხრა ჟურნალისტებს საბაზო სკოლის ყოფილმა მასწავლებელმა მაია ღვანია. ამასთან, ნარაზენის საბაზო სკოლის ყოფილი შენობა, სადაც ამჟამად 2 კლას-კომპლექტი ფუნქციონირებს, სარემონტო სამუშაოებს საჭიროებს. კერძოდ, იატაკი და კარ-ფანჯრები ჩამტვრეულია, ინვენტარი ძველი და გამოუსადეგარია და ასევე, ამორტიზირებულია საპირფარეშოს შენობა. ნარაზენის საბაზო სკოლის ყოფილმა პედაგოგებმა დახმარებისთვის „საერთაშორისო გამჭვირვალობა-საქართველოს“ ზუგდიდის ოფისს მიმართეს. როგორც ორგანიზაციის ანალიტიკოსი არჩილ თოდუა ამბობს, მათ ნარაზენის საბაზო სკოლასთან დაკავშირებით, განათლების სამინისტროს წერილით უკვე მიმართეს. „მათგან მიღებული წერილი, არ არის პასუხი იმ კითხვებზე რა კითხვებიც ჩვენ მათ დაუსვით. სამინისტროს წერილის შინაარსი გაუგებარია ანუ იქ არ არის დაკონკრეტებული თუ რა მიზეზით გაუქმდა ეს სკოლა“, - ამბობს არჩილ თოდია. მისივე განმარტებით, „საერთაშორისო გამჭვირვალობა-საქართველო“ კვლავ შეეცდება განათლების სამინისტროსგან კონკრეტული პასუხი მიიღოს და ამისთვის ორგანიზაცია უწყებას წერილობით ხელახლა მიმართავს. რადიო „ათინათი“ მთელი დღის განმავლობაში ცდილობდა ზუგდიდის განათლების რესურს ცენტრის უფროსთან ლელა ქებურიასთან დადაკავშირებას თუმცა ქებურია სატელეფონო ზარებს არ პასუხობს.