ზუგდიდის მუნიციპალიტეტის სოფელ ოქტომბრის საჯარო სკოლაში სასწავლო პროცესი უკვე მეხუთე დღეა ჩაშლილია. მშობლების ნაწილი სკოლის შენობაში, პროტესტის ნიშნად დღესაც შეიკრიბნენ. მათი მოთხოვნა უცვლელია, ისინი სკოლისთვის საჯაროს სტატუსის დაბრუნებას ითხოვენ. მშობლების მოთხოვნას პედაგოგებიც უერთდებიან. „ვითხოვთ, მე-12-ე კლასამდე აქ ისწავლონ ჩვენმა შვილებმა. მითუმეტეს სოფელ ოქტომბერში ერთი საშუალო სკოლაა. გვაინტერესებს რატომ არ უნდა იყოს ოქტომბერში საშუალო სკოლა“, - აცხადებენ მშობლები. ზუგდიდის საგანმანათლებლო რესურსცენტრის უფროსი ლელა ქებურიას თქმით, განათლების სამინსტროსთვის ცნობილია ოქტომბრის მოსახლეობის მოთხოვნები და უწყებისგან პასუხს ორშაბათს ელოდებიან. ქებურიასთვის გაუგებარია თუ რატომ გრძელდება საპროტესტო აქციები, მაშინ როდესაც სამინისტროსგან პასუხის მიღების ზუსტი დრო მოსახლეობისთვის ცნობილია.