ზუგდიდში დღეს,20 სექტემბერს ნინო ბურჯანაძის მხარდამჭერთა დარბაზი დაარსდა, სადაც 380 ადამიანია გაწევრიანებული. „დემოკრატიული მოძრაობა - ერთიანი საქართველოს“ სამეგრელო-ზემო სვანეთის ორგანიზაციის ლიდერმა ზამირა ღადუამ განაცხადა, რომ მხარდამჭერთა დარბაზში ყველა სფეროს ადამიანები არაინ გაწევრიანებული, რომლებიც, მისივე თქმით, დადებით პოლიტიკურ კლიმატს ქმნიდნენ ზუგდიდში. "სწორედ ეს ადამიანები იქნებიან საარჩევნო შტაბის მონიტორინგის ჯგუფის წარმომადგენლები, რომლებიც ხალხში ნინო ბურჯანაძის საარჩევნო პროგრამის გაცნობაზე იმუშავებენ",- ამბობს ზამირა ღადუა. შეხვედრაზე ასევე, რეგიონში წინასაარჩევნო გარემოზე ისაუბრეს და ახალი მთავრობის საქმიანობა შეაფასეს. პარტიის ერთ-ერთმა კოორდინატორმა სამეგრელოს რეგიონში დავით ქანთარიამ აღნიშნა, რომ ბიძინა ივანიშვილმა ხალხისთვის მიცემული დაპირებები არ შეასრულა. ქანთარიას განცხადებამ სამოქალაქო მოზრაობა „თეთრი მანდილის“ წარმომადგენლის ინეზა მურღულიას უკმაყოფილება გამოიწვია. მან შეხვედრა პროტესტის ნიშნად დატოვა. ამასთან, ბიძინა ივანიშვილის პოლიტიკურ მიღწევებზე და საპარლამენტო არჩევნების მონაპოვარზე ისაუბრა დარბაზის ერთ-ერთმა წარმომადგენელმა, დილარ დაგარგულიამ, რომელმაც აღნიშნა რომ ქვეყნის წინსვლისთვის აუცილებელია ივანიშვილს გვერდით დაუდგეს ისეთი ცნობილი პოლიტიკოსი, როგორიც ნინო ბურჯანაძეა.