ფესტივალი „არტ-გენი" 2012-ის რეგიონალური ტური დასავლეთ საქართველოში გრძელდება. დღეს “არტ-გენს" ზუგდიდმა უმასპინძლა. ღონისძიებაზე, რომელიც ზუგდიდის ბოტანიკურ ბაღში ჩატარდა, წარმოდგენილი იყო ხალხური სიმღერა, ცეკვა, სახალხო პოეზია. ჩამოსულ სტუმრებთან ერთად „არტ–გენში“ მონაწილეობა მიიღო ანსამბლმა ,,ოდოიამ“. კონცერტის პარალელურად, ბოტანიკური ბაღის ტერიტორიაზე გამოიფინა ზუგდიდელი ხელოვანების მიერ შექმნილი ხალხური რეწვის ნიმუშები. რადიო "ათინათს" ფესტივალის ერთ–ერთი დამფუძნებელი ზაზა კორინთელი ესაუბრა: ”წლევანდელი სლოგანია  „ გავუფრთხილდეთ ოჯახს“, ოჯახს რომელიც არის პირველწყარო ცოდნის გადაცემის და ტრადიციების გაგრძელების,  რაც შეეხება თბილისის დასკვნით ნაწილს, იქნება წარმოდგენილი 21 ივლისიდან 29 ივლისის ჩათვლით, სადაც საქართველოს რეგიონებიდან და ადგილობრივი სტუმრების გარდა იქნებიან მსოფლიოს 9 ქვეყნიდან მონაწილეები და ეს არის ჩვენი ქვეყნის კულტურის ერთგვარი პოპულარიზაცია“–განაცხადა ზაზა კორინთელმა. ფესტივალის მონაწილე, ლოტბარი პოლიკარპე ხუბულავაამბობს, რომ მსგავსი ფესტივალები ხშირად უნდა ტარდებოდეს, რათა გადარჩეს ხალხური ხელთუქმნელი ფოლკლორი. მონაწილეთა შორის საუკეთესოები წარდგენილნი იქნებიან ფესტივალის დასკვნით ნაწილზე თბილისში, რომელიც ჩიატაიას სახელობის საქართველოს ხუროთმოძღვრებისა და ყოფის სახელმწიფო მუზეუმში გაიმართება.