აფხაზეთის დე-ფაქტო რესპუბლიკის საგარეო საქმეთა სამინისტრო ეუთო-ს საპარლამენტო ასამბლეის მიერ საქართველოსთან დაკავშირებით მიღებული რეზოლუციის გამო მწუხარებას გამოთქვამს. როგორც ე.წ. საგარეო საქმეთა სამინისტროს მიერ გავრცელებულ განცხადებაშია ნათქვამი, ნებიმიერი სახის საერთაშორისო დოკუმენტი უნდა ეყრდნობოდეს რეალური ვითარების შეფასებას. "აფხაზეთი არის სუვერენული სახელმწიფო, რომელიც გაერო-ს რამდენიმე წევრმა ქვეყანამ აღიარა. აქედან გამომდინარე, რეზოლუციაში საქართველოს ტერიტორიული მთლიანობის მხარდაჭერით, ეუთო-ს საპარლამენტო ასამბლეა მთლიანად იგნორირებას უკეთებს იმ პოლიტიკურ რეალობას, რომელიც 2008 წლის აგვისტოს შემდეგ შეიქმნა", - ნათქვამია განცხადებაში. ე.წ. საგარეო უწყება ხაზს უსვამს, რომ ტერმინ "ოკუპირებული ტერიტორიების" გამოყენება აფხაზეთთან და ე.წ. სამხრეთ ოსეთთან მიმართებაში, მიუღებელია და არასწორია. რაც შეეხება ევროკავშირის სადამკვირვებლო მისიის წარმომადგენლების დაშვებას ოკუპირებულ ტერიტორიებზე, აფხაზეთის ე.წ. საგარეო უწყებაში აცხადებენ, რომ ეს უსაფუძვლოა და ეწინააღმდეგება მედვედევი-სარკოზის შეთანხმებას. 9 ივლისს, ეუთო-ს საპარლამენტო ასამბლეამ საქართველოსთან დაკავშირებით რეზოლუცია ხმათა უმრავლესობით დაამტკიცა. რეზოლუციაში ჩაიწერა, რომ რუსეთმა ცეცხლის შეწყვეტის შესახებ შეთანხმება უნდა შეასრულოს. ეუთო მოსკოვს ოკუპირებულ ტერიტორიებზე ევროკავშირის დამკვირვებლების დაშვების და დევნილთა მდგომარეობის გაუმჯობესებისკენაც მოუწოდებს. მოსკოვი ტერმინს - "დე-ფაქტო ხელმძღვანელობებსაც" აპროტესტებდა, თუმცა რეზოლუციაში, რომლის ავტორიც პოლონელი დეპუტატი მიხეილ შცერბაა, არც ეს რეკომენდაცია გაითვალისწინეს. დოკუმენტში კიდევ ერთხელ ჩაიწერა, რომ ეუთო მხარს უჭერს საქართველოს საერთაშორისოდ აღიარებულ საზღვრებში.