მალაიზიის ავიახაზების კუთვნილი "Boeing 777" დღეს უკრაინის ტერიტორიაზე, რუსეთის საზღვართან ახლოს ჩამოვარდა. ამის შესახებ "ინტერფაქსი" საავიაციო წრეებში სანდო წყაროზე დაყრდნობით იუწყება. "თვითმფრინავმა, რეისით ამსტერდამი-კუალა-ლუმპური, რუსეთის საჰაერო სივრცეში შესვლამდე 50 კილომეტრში მოულოდნელად დაშვება დაიწყო და ის უკვე ხმელეთზე მაშინ აღმოაჩინეს, როდესაც უკვე ცეცხლი ეკიდა", – განაცხადა სააგენტოს წყარომ. მისივე მონაცემებით, ავიალაინერში 280 მგზავრი და ეკიპაჟის 15 წევრი იმყოფებოდა. სააგენტოს ინფორმაციითვე, რუსეთის საზღვარი თვითმფრინავს მოსკოვის დროით, 17:25 წუთისთვის უნდა გადაეკვეთა. ამასთან, "უკრაინსკაია პრავდა" სანდო წყაროზე დაყრდნობით იუწყება, რომ უკრაინის დონეცკის ოლქში ჩამოაგდეს მალაიზიის ავიახაზების კუთვნილი სამგზავრო "ბოინგი". ის დასახლებულ პუნქტ გრაბოვოში ჩამოვარდა.