ზუგდიდში, სოციალურ კაფე "მეგობარში" პროექტის "დაბრენდე ხელოვნება" შემაჯამებელი შეხვედრა 28 ივნისს გაიმართა. მისი მონაწილეები ამბობენ, რომ მსგავსი ტიპის პროექტები ხელს უწყობენ რეგიონში მცხოვრები ახალგაზრდების შესაძლებლობების განვითარებას, რაც სამომავლოდ, მათ პროდუქტიულობაზე დადებითად აისახება.

"პროექტი დამეხმარა ჩემი იდეის სრულყოფაში. კერძოდ, შევქმენი ბრენდი "ქიცა". ეს არის აბრეშუმის თავსაბურავი ქალებისთვის, რომელიც შეიქმნა ძლიერი ქალების ინსპირაციით. პროექტის ფარგლებში მოწვეული სპეციალისტები ინდივიდუალურად გვეხმარებოდნენ ჩვენი იდეის უფო მეტად დახვეწაში. ჩაგვიტარდა არაერთი მასტერკლასი გრაფიკული დიზაინის სოციალური ქსელების მართვის და ბრენდინგის მიმართულებით. ვფიქრობ მსგავსი ტიპის პროექტები ხელს უწყობს და მოტივაციას აძლევს რეგიონში მცხოვრებ ახალგაზრდებს", - თქვა მარიამ ანჯაფარიძემ, პროექტის მონაწილემ. "ახალგაზრდები სამეგრელოს განვითარებისთვის" თანადამფუძნებელი ნანა შედანია ამბობს, რომ, პროექტის ფარგლებში, ზუგდიდის მუნიციპალიტეტში მცხოვრებმა შემოქმედებით სფეროში მოღვაწეებმა გაიარეს სხვადასხვა მიმართულებით ტრენინგ-კურსები, მათ შორის ბრენდინგი, მარკეტინგი, დიზაინი. მისი თქმით, პროექტის ეს ნაწილი უშუალოდ ეხებოდა მათი საქმიანობის გაუმჯობესებას და მათი პროდუქტის, სერვისის გაყიდვის ხელშეწყობას.

"ბოლო აქტივობა იყო ურთაფესტი, რომელიც უკვე ჩატარდა. ის დაიგეგმა უშუალოდ პროექტის მონაწილეების მიერ, ისინი ფესტივალის წინა დღეებში ჩაერთნენ სამუშაოებში იმისთვის, რომ ეს დღე შემდგარიყო. მე შემიძლია ვთქვა, რომ ისინი, ვინც ამ პროექტს ესწრებოდნენ, უკვე განავრცობენ მათ საქმიანობას მეტად ეფექტურად და გამართულად", - განმარტავს შედანია.

28 ივნისს მენტორებმა და ტრენერებმა მონაწილეები შეაფასეს, გამოავლინეს სამი მონაწილე და მათ სიმბოლური ვაუჩერები გადასცეს, რომელსაც ისინი თავიანთი საქმიანობის განვითარებისთვის გამოიყენებენ.