შეხვედრაში, რომელშიც რუსეთის ფედერაციასა და დე ფაქტო აფხაზეთს შორის სავაჭრო ეკონომიკური ურთიერთობების გაღრმავებაზე ისაუბრეს, სოხუმმა ჩეჩნეთის რესპუბლიკის სავაჭრო სამრეწველო პალატასთან თანამშრომლობის შესახებ შეთანხმებას მოაწერა ხელი. სხდომაში მონაწილეობდნენ რესუთის ფედერაციის სავაჭრო-სამრეწველო პალატის წარმომადგენლები , ხოლო სტუმრის სტატუსით მიწვეულები იყვნენ დე ფაქტო აფხაზეთის ეკონომიკის მინისტრი ადგურ არძინბა და „პრეზიდენტის“ მრჩეველი ამირან ლაგვილავა.

რუსეთის ფედერაციის სავაჭრო-სამრეწველო პალატის წარმომადგენელმა ვლადიმირ პადალკომ ხაზი გაუსვა აფხაზეთის საერთაშორისო საქმიან ფორუმებში მონაწილეობის მნიშვნელობას: «ეს ხელს შეუწყობს უცხოური ბიზნეს-საზოგადოებრიობის წარმომადგენლებთან საგარეო სავაჭრო კავშირების დამყარებას», – თქვა მან.

აფხაზეთის ე.წ.  ეკონომიკის  მინისტრმა ადგურ არძინბამ მოხსენება გააკეთა, რომელშიც აღნიშნა, რომ „ვიწრო აღიარების გამო“, აფხაზეთი ვერ მოიზიდავს სერიოზულ ინვესტიციებს, ამიტომ, ამ ფონზე, „პრიორიტეტულია რუსეთთან საგარეო სავაჭრო ურთიერთობების განვითარება», – აღნიშნა მინისტრმა.