ზუგდიდში მოქმედმა საზოგადოებრივი ორგანიზაციის წარმომადგენლებმა და მოქალაქეებმა ხურჩა-ნაბაკევის ე.წ. საზღვართან მომხდარი მკვლელობა გააპროტესტეს. ისინი შემთხვევის ადგილას შეიკრიბნენ და საერთაშორისო ორგანიზაციებს შესაბამისი ზომების მიღებისკენ მოუწოდეს.

"ის რაც მოხდა არის დიდი ტრაგედია. მსგავსი რამ საქართველოში არასოდეს უნდა განმეორდეს", - აღნიშნა მოქალაქე ციცინო შენგელიამ.

სამეგრელო-აფხაზეთის ადმინისტრაციულ საზღვართან მკვლელობა გუშინ, 19 მაისს მოხდა. თვითმხილველების თქმით, გიგა ოთხოზორია დე ფაქტო აფხაზეთის საბაჟოს თანამშრომელმა ურთიერთშელაპარაკების ნიადაგზე ცეცხლსასროლი იარაღით მოკლა. გარდაცვლილს 6 ტყვია აქვს მოხვედრილი.