ასოციაცია "ათინათის" ახალგაზრდული ცენტრის წევრების ორგანიზებით და მონაწილეობით ზუგდიდის ტექნოპარკში კონფერენცია თემაზე: "კულტურა და მრავალფეროვნება" გაიმართა. მოსწავლეებმა საქართველოს სხვადასხვა კუთხის დამახასიათებელ ტრადიციებზე მომზადებული თემები წარადგინეს. კლუბის კოორდინატორის სალომე გუგუჩიას თქმით, ღონისძიების მიზანია ახალგაზრდებმა გაიღრმავონ ცოდნა კულტურათაშორისი დიალოგის მნიშვნელობაზე, განსხვავებული ეთნიკური ჯგუფების კულტურული მრალფეროვნებისა და ადგილობრივი ტრადიციების შესახებ.




შეხვედრას ზუგდიდის მუნიციპალიტეტის მერიის  განათლების, კულტურის, ახალგაზრდულ საქმეთა და სპორტის სამსახურის უფროსის მოადგილე ზამირა ღადუა და ადგილობრივი ხელისუფლების სხვა წარმომადგენლები ესწრებოდნენ. ღადუას თქმით, მოსწავლეების მიერ მომზადებული ნამუშევრები ძალიან მნიშვნელოვანია, რადგან ისინი ჩვენი ქვეყნის ტრადიციებს ეხება.


ახალგაზრდებმა სულ 18 თემა მოამზადეს, რომელთაგან სპეციალურმა ჟიურიმ ორი საუკეთესო გამოავლინა. გამარჯვებულებს ფასიანი საჩუქრები გადაეცათ, ხოლო მონაწილეებს - სიგელები.

კონფერენცია ტარდება ტოლერანტობის სამოქალაქო ცნობიერებისა და ინტეგრაციის მხარდაჭერის პროგრამის PITA-ს ფარგლებში, მას საქართველოს გაეროს ასოციაცია (UNAG) ახორციელებს, აშშ-ს საერთაშორისო განვითარების საააგენტოს (USAID) ფინანსური მხარდაჭერით. პროექტს სამეგრელოში ასოციაცია "ათინათი" ახორციელებს.