გარემოსდაცვითი ზედამხედველობის დეპარტამენტის ინფორმაციით, წალენჯიხისა და ფოთის მუნიციპალიტეტებში უკანონო თევზჭერის ფაქტები გამოავლინეს.

უწყებაში აცხადებენ, რომ წალენჯიხის სოფელ ჭალეში, მდინარე ენგურზე მოქალაქე გასაბერი ნავიდან, ელექტროიარაღის გამოყენებით თევზაობდა. სამართალდამრღვევმა ტობის სახეობის დაახლოებით 2 კგ. თევზი უკანონოდ მოიპოვა.

ამავე ცნობით, შესაბამისი სამსახურის თანამშრომლებმა ქალაქ ფოთში, მდინარე კაპარჭინაზე, აკრძალული საშუალებით თევზაობის ფაქტი აღკვეთეს. ადგილზე კეფალის სახეობის 2,2 კგ. თევზი აღმოაჩინეს.

გზდ-ში აღნიშნავენ, რომ ორივე შემთხვევა სისხლის სამართლის დანაშაულის ნიშნებს შეიცავს, მასალები, შემდგომი რეაგირების მიზნით, შესაბამის უწყებებში გადაიგზავნა.