დევნილთა სამინისტროს წარმომადგენლებთან შეხვედრით უკმაყოფილოები დარჩნენ ის დევნილები, რომლებიც ზუგდიდში დილიდან აქციას მართავდნენ. მათი პროტესტი ბინების გადანაწილების საკითხს მოჰყვა, რომლის მიხედვით წელს დევნილების გარკვეული ნაწილი ახალ საცხოვრებელ ფართებს ვერ მიიღეს. აქციის მონაწილეები თავს მოტყუებულებად მიიცნევენ და ამბობენ, რომ მათ მიმდინარე წელს ბინების გადაცემას ჰპირდებოდნენ.

„ასე მპირდებიან 25 წელია და საბოლოო ჯამში არაფერია შედეგი. ახლა შევხედი მათ და მითხრეს მომავალ წელს გაგითვალისწინებთო. აქ მოვედი მცირეწლოვან შვილთან ერთად, თან ვარ ფეხმძიმედ. ყველამ იცის ჩემი საცხოვრებელი პირობები. იატაკი დამპალია იქიდან თაგვები და ქვეწარმავლები ამოდიან. ისეთი პირობებია ბავშვები სულ გაციებული მყავს. დასკვანაც მაქვს, სადაც წერია რომ რთული საცხოვრებელიპირობები მაქვს, მაგრამ ქულები დამაკლეს, გადამოწმებისას მიტხრეს, არაა საგანგაშო პირობებიო“, - თქვა მონიკა როსტობაიამ.

საპროტესტო აქციის მონაწილეებმა დევნილთა სამმართველოს შენობაში შეჭრა რამდენჯერმე სცადეს, თუმცა ამის უფლება მათ ადგილზე მობილიზებულმა პოლიციის თანამშრომლება არ მისცეს. სამართალდამცავებსა და დევნილებს შორის მცირე შეხლა-შემოხლის შემდეგ, აქციის მონაწილეები სამინისტროს წარმომადგენლებს რიგრიგობით შეხვდნენ.

რიგში მდგომმა ქეთევან გოგიამ გვითხრა, რომ ის სოფელ დიდინეძში, ბაგა-ბაღის ყოფილ შენობაში გაუსაძლის პირობებში უკვე წლებია ცხოვრობს. გვიყვება, რომ შენობას მესამე ხარისხის დაზიანება აღენიშნება და საცხოვრებლად გამოუსადეგარია. მან შესაბამისი დასკვნაც გვიჩვენა.

„კომისია რამდენჯერ მოვიდა. დაადასტურეს, რომ აუცილებლად გასახლებას ვექვემდებარებოდით. დასკვანც არის შესაბამისი. ვერაფრით ვერ წარმოვიდგენდი, რომ სიაში ჩემს თავს ვერ ვნახავდი. წუხელ ეს რომ გავიგე გავნერვიულდი. ჩემთან ერთად შვილიშვილი ცხოვრობს, ისიც ისე განიცდის მთელი ღამე ტიროდა. ამბობს, აქედან წავალო, საერთოდ დავტოვებ აქაურობასო. რა ვქნა შვილო, ჩემი ბრალია, რომ არ მომცეს... მე პენსიონერი ვარ, მაქვს სოციალური, ამდენი ნერვიულობის შედეგაგ ჯამრთელობაც შემერყა. გულის ინფარქტი მაქვს გადატანუილი, ინსულტიც, ტვინის იშემიური დაავადება მაქვს. კიდევ რამე არის საჭირო? არ ვიცი“, - ამბობს ქეთევან გოგია.

აქციის მონაწილეების ნაწილმა სამინისტროს წარმომადგენლებთან შეხვედრის შემდეგ ტერიტორია დატოვეს.

„რა აზრი აქვს აქ დგომას და ყვირილს, შედეგი მაინც არ იქნება“, - თქვეს მათ.

დევნილების მეორე ნაწილი დათმობას არ აპირებს და პროტესტის გაგრძელებას სხვდასხვა ფორმით გეგმავს.

„ავიღებ ჩემს ჩანთერბს და იმ ახალაშენებულ კორპუსებს მივადგები. არაფრით არ დავთმობ ამას. ესენი ხან რა ქულას მიწერს ხან რა, ყველაფერს ისე წერენ როგორც უნდათ“, - თქვა ნაზი ჯობავამ.

თავის მხრივ, ლტოლვილთა და განსახლების სამინისტროს დევნილთა საკითხების დეპარტამენტის უფროსი მურად აბლოთია მზადყოფნას გამოთქვამს, რომ უწყების გადაწყვეტილებით უკმაყოფილო დევნილებს შეხვდეს, თუმცა დასზენს, რომ წელს ბინების გადაცემის პროცესი დასრულებულია.

“უკვე შევხვდი რამდენიმე მათგანს და კიდევ ვაპირებ მათთან შეხვედრას და გასაუბრებას. ბინების გადაცემის პროცესი არის გამჭვირვალე. სამწუხაროდ, ამ ადამიანების ნაწილს ქულები არ ეყო წელს ბინის მისაღებად, თუმცა მომავალ წელს ფართს 360 ოჯახი მიიღებს, მათ შორის ისინი, ვინც დღეს აქ არიან. შარშან ვინც ვერ მიიღო ბინა, წელს მოხვდა სიაში. ყველაფერს თავისი წესი და დრო აქვს“, - აღნიშნა აბლოთიამ.

იძულებით გადაადგილებულ პირთა საკითხების შემსწავლელმა კომისიამ დაასრულა ბინების განაწილების პროცესი, რის შედეგადაც 240 დევნილი ოჯახი ზუგდიდში საცხოვრებელ ფართს მიიღებს. სამინისტროს ვებ-გვერდზე გუშინ იმ ოჯახების სია გამოქვეყნდა, რომლებსაც გრძელვადიანი განსახლების კრიტერიუმების შესაბამისად, ახალაშენებულ კორპუსებში ბინები გადაეცემათ. ამავე ცნობით, სამეგრელოს რეგიონში 9 ნგრევადი ობიექტი დაიხურება.

ამავე თემაზე:

დევნილები სამმართველოსთან საპროტესტო აქციას მართავენ (ვიდეო)

ზუგდიდში დევნილებმა სამმართველოს შენობაში შეჭრა სცადეს (ვიდეო)

ზუგდიდში 240 დევნილ ოჯახს ბინა გადაეცემა - სრული სია