ზუგდიდის მერიამ მუნიციპალიტეტის ტერიტორიაზე კომპაკ სპორტინგში შეჯიბრების ორგანიზებისთვის 14 997 ლარი გამოყო. ამის შესახებ სახელმწიფო შესყიდვების ვებ გვერდზე ვკითხულობთ.

ღონისძიების ღირებულება 4 997 ლარით აღემატება 2023 წელს მისთვის გამოყოფილ თანხას.

ტენდერში გამარჯვებულმა პრეტენდენტმა შემდეგი სამუშაოები უნდა შეასრულოს: შეჯიბრებისთვის საჭირო უსაფრთხო სივრცის, სასროლი მოედნისა და სასროლი პოზიციების (სპეციალური კონსტრუქცია მსროლელისთვის) მოწყობა უზრუნველყოს; თეფშის სასროლი მანქანები, სასროლი თეფშები და სასაჩუქრე ვაზნები უნდა დააორგანიზოს; მსაჯი და ტექნიკური მუშაკი მოიწვიოს.

ტენდერში წინადადებები 27-დან 30 აგვისტოს ჩათვლით მიიღება. გამარჯვებული კომპანია კი ვალდებული იქნება ხელშეკრულებით გათვალისწინებული მოთხოვნები მიმდინარე წლის 21-დან 23 სექტემბრამდე შეასრულოს.