აბაშის მუნიციპალიტეტში ძლიერმა წვიმამ ზიანი მიაყენა ადმინისტრაციულ ერთეულებს. ამის შესახებ ინფორმაცია ადგილობრივი მერიის ფეისბუქ გვერდზე გავრცელდა.

ამავე ცნობით, დაიტბორა საცხოვრებელი სახლების პირველი სართულები, სახნავ-სათესი სავარგულები, შიდა საუბნო გზები.
მერიაში განმარტავენ, რომ სამიქაო-მაიდნის ადმინისტრაციულ ერთეულში მდინარე კოვზა ნაპირებიდან გადმოვიდა და დატბორა მიმდებარე ტერიტორია.

მათი თქმით, არსებულ ვითარებას ადგილობრივი ხელისუფლების წარმომადგენლები ადგილზე გაეცნენ.

სტიქიის ადგილებზე მუშაობენ მუნიციპალური სამსახურები და აბაშის სახანძრო-სამაშველო განყოფილების მეხანძრე-მაშველები.

ცნობისთვის, ძლიერმა წვიმამ ზუგდიდის მუნიციპალიტეტშიც შექმნა პრობლემები. უხვმა ნალექმა საცხოვრებელი სახლების პირველი სართულები და საკარმიდამო ნაკვეთები დატბორა, ასევე ჩამოირეცხა შიდა საუბნო გზები.