საქართველოს ჯანდაცვის მინისტრის მიხეილ სარჯველაძის განცხადებით, მოქალაქეებს არაელექტრონული, ე.წ. ლამინირებული პირადობის მოწმობებით პენსიისა და სხვა სოციალური შემწეობის აღება მომდევნო ერთი თვის განმავლობაში შეუძლიათ.

მან ბრიფინგზე თქვა, რომ ეს დროებითი პროცესი იქნება და არ ნიშნავს ვადის გახანგრძლივებას. ამასთან, მისივე ინფორმაციით, საკმაოდ მაღალია იმ მოქალაქეების რაოდენობა, რომლებმაც ე.წ ქაღალდის დოკუმენტები არ შეცვალეს ელექტრონული ID ბარათებით.

"იმისთვის, რათა ქაღალდის პირადობის მქონე მოქალაქეები არ დარჩნენ მომავალში პენსიის ან სხვა სოციალური გასაცემელის გარეშე, მინდა მათ მივმართო და მათ მოვუწოდო, რომ მიმართონ იუსტიციის სახლებს და აიღონ თანამედროვე პირადობის მოწმობა, რათა, მომავალში არ შეექმნათ დაბრკოლება პენსიისა და სხვა სოციალური დახმარების მისაღებად, ასევე სხვა ნებისმიერი მომსახურების მისაღებად, რომლისთვისაც ზოგადად მათ სჭირდებათ პირადობის დადასტურება", - ამბობს მინისტრი.

შეგახსენებთ, 1 ივლისიდან, 2011 წლის 28 ივლისამდე გაცემული არაელექტრონული, უვადო პირადობის მოწმობები გაუქმდა. მას ელექტრონული პასპორტი, ID ბარათი ჩაანაცვლებს.

გასული წლის დეკემბერში საქართველოს საკანონმდებლო ორგანოში შესაბამისი კანონპროექტი დაინიციირდა, რის მიხედვითაც, მოქალაქეები ძველი დოკუმენტით არჩევნებზე ხმის მიცემასა და საბანკო სერვისებით სარგებლობას, მათ შორის პენსიის მიღებას, ვეღარ შეძლებენ.



ამავე თემაზე: 

დღეიდან ე.წ ლამინირებული პირადობის მოწმობები უქმდება

1 ივლისიდან ე.წ ლამინირებული მოწმობით ვეღარ იმგზავრებთ - საქართველოს რკინიგზა

2024 წლიდან იგეგმება ე.წ ლამინირებული პირადობის მოწმობის გაუქმება

2011 წლამდე გაცემული ლამინირებული პირადობები უსასყიდლოდ ჩანაცვლდება - რატი ბრეგაძე