„ეროვნულ-დემოკრატიული ინსტიტუტი“ (NDI) 2024 წლის 26 ოქტომბრის საპარლამენტო არჩევნებისთვის გრძელვადიანი შეფასების მისიას იწყებს. ამის შესახებ ინფორმაცია მათ საკუთარ ვებ გვერდზე გამოაქვეყნეს.

ორგანიზაციის ცნობით, შესაბამისი გუნდი ხუთი ანალიტიკოსის, მისიის ხელმძღვანელისა და მათი თანაშემწეებისგან შედგება. ისინი საქართველოში რამდენიმე დღეში ჩამოვლენ და ნოემბრის ბოლომდე არჩევნებთან დაკავშირებულ პოლიტიკურ პროცესებს დააკვირდებიან.

ისინი განმარტავენ, რომ შესასწავლ საკითხებს შორისაა:

საარჩევნო კამპანიის პროცესი

საარჩევნო ადმინისტრაცია

მედიისა და საინფორმაციო გარემო

გენდერისა და ინკლუზიის საკითხები

მთავრობისა და საარჩევნო ადმინისტრაციის წარმომადგენლები

მმართველი და ოპოზიციური პოლიტიკური პარტიები

სამოქალაქო საზოგადოების ორგანიზაციები და ადგილობრივი სადამკვირვებლო ორგანიზაციები.

„მომავალი თვეების განმავლობაში NDI აქტიურად იქნება ჩართული საარჩევნო პროცესების გაძლიერებაში და რეკომენდაციების შემუშავებისას გრძელვადიანი ანალიტიკოსების მიგნებებს დაეყრდნობა“, - წერს ეროვნულ-დემოკრატიული ინსტიტუტი.

როგორც ორგანიზაცია განმარტავს, NDI-ის გრძელვადიანი შეფასების მისია პროცესს მიუკერძოებლად და პროფესიონალურად, საქართველოს კანონმდებლობისა და არჩევნებზე საერთაშორისო დაკვირვების პრინციპების შესახებ დეკლარაციის შესაბამისად დააკვირდება.