შეფასებისა და გამოცდების ეროვნულმა ცენტრმა ისტორიის, მათემატიკის, ბიოლოგიისა და ქიმიის გამოცდების შედეგები გამოაქვეყნა.

მიღებული ქულების სანახავად აბიტურიენტი უნდა შევიდეს ვებგვერდზე: https://online.naec.ge/ და შესაბამის ველში საიდენტიფიკაციო მონაცემებთან ერთად, უნდა მიუთითოს ხუთნიშნა პაროლი.
„შეფასებისა და გამოცდების ეროვნული ცენტრი ეტაპობრივად, ნაშრომების გასწორების დასრულებისთანავე გამოაქვეყნებს აბიტურიენტთა პირველად შედეგებს სხვა საგამოცდო საგნებშიც“- აღნიშნავს naec.

შეგახსენებთ, ცენტრმა აღნიშნული პროცესი 3 აგვისტოს, ქართული ენისა და ლიტერატურის, ასევე, ოსურის ენის გამოცდების შედეგების გამოქვეყნებით დაიწყო.

ინფორმაციისთვის, 2024 წლის 3 ივლისიდან 26 ივლისის ჩათვლით, აბიტურიენტებმა გამოცდები სხვადასხვა საგანში, მათ შორის ქართულ ენასა და ლიტერატურაში, უცხო ენაში, მათემატიკაში, ისტორიაში, გეოგრაფიასა და ფიზიკაში ჩააბარეს.

წელს, ერთიანი ეროვნული გამოცდებისათვის რეგისტრაცია 47 ათასზე მეტმა აბიტურიენტმა გაიარა. სტუდენტთა საგრანტო კონკურსში მონაწილეობის სურვილი 3000-ზე მეტმა სტუდენტმა გამოთქვა, ხოლო საერთო სამაგისტრო გამოცდისათვის ელექტრონული განაცხადი 10 000-ზე მეტმა აპლიკანტმა შეავსო.