ფინანსთა სამინისტროს საგამოძიებო სამსახურის ინფორმაციით, ქვეყნის მასშტაბით, აგვისტოში უაქციზო სიგარეტის შენახვა-გადაზიდვა- რეალიზაციის 11 შემთხვევა მოხდა.

უწყების ცნობით, დანაშაულზე ბრალდებულის სახით პასუხისგებაში 11 პირი მიეცა, მათგან 2 კი დაკავებულია.

"საგამოძიებო მოქმედებების შედეგად, დანაშაულში მხილებული პირებისგან ამოღებულია სარეალიზაციოდ განკუთვნილი სხვადასხვა დასახელების ჯამში 17 483 კოლოფი უაქციზო სიგარეტი, რომლის საერთო საბაზრო ღირებულება 90 000 ლარს აღემატება", - ვკითხულობთ სამსახურის ვებ გვერდზე.

როგორც ისინი განმარტავენ, გამოძიება სისხლის სამართლის კოდექსის მე-200 მუხლით მიმდინარეობს, რაც სასჯელის სახით თავისუფლების 6-დან 8 წლამდე ვადით აღკვეთას ითვალისწინებს.