სოხუმში აცხადებენ, რომ ელექტროენერგიის მოხმარების მიმდინარე რეჟიმის გათვალისიწნებით, რუსული „სოციალური ნაკადის“ ლიმიტი, შესაძლოა, 18 თებერვალს ამოიწუროს. ამის შესახებ „ჩერნომორენერგოს“ დირექტორმა, თემურ ჯინჯოლიამ განაცხადა.

მან აღნიშნა, რომ შემდგომი სიტუაცია დამოკოდებულია ელექტროენერგიის მოხმარების დონეზე და ამინდზე. გარდა ამისა, საუბრა აფხაზეთში კრიპტოვალუტის მაინინგის გააქტიურებაზე და ხაზი გაუსვა ამ აქტივობის წინააღმდეგ ბრძოლის გაძლიერების აუცილებლობას. მისი თქმით, მაინინგი დღეში დაახლოებით 500 ათას კვტ/სთ ენერგიას მოიხმარს.

მანამდე, ენერგოკომპანიაში განაცხადეს, რომ 9 იანვრიდან, აფხაზეთის დე ფაქტო რესპუბლიკის ტერიტორიაზე ელექტროენერგიის მიწოდებაზე ახალი შეზღუდვები ამოქმედდება და დენი დღე - ღამის განმსვლობაში 6 საათით გაითიშება.

მათივე ცნობით, ამ ზომებს, რუსეთის ფედერაციიდან ელექტროენერგიის სოციალური ნაკადის დაზოგვის აუცილებლობის გამო მიმართეს.

ამასთან, ახალი წლის დღესასწაულებთან დაკავშირებით, 2024 წლის 31 დეკემბერსა და 2025 წლის 1 იანვარს, მოსახლეობას ელექტროენერგია უწყვეტად მიეწოდებოდა.

ცნობისთვის, რუსეთმა ოკუპირებული აფხაზეთისთვის ელექტროენერგიის ჰუმანიტარული ნაკადის მიწოდება 23 დეკემბერს დაიწყო.

ნოემბრის დასაწყისში, მოსკოვმა სოხუმს უფასო ელექტროენერგიის მიწოდება შეუწყვიტა.

11 დეკემბრიდან მოსახლეობას დღისით არასრული სამ საათით მიეწოდებოდა დენი.

აფხაზი ლიდერის ასლან ბჟანიას გადადგომის და ე.წ. პარლამენტის მიერ მოსკოვთან „საინვესტიციო ხელშეკრულების“ ჩაგდების შემდეგ, რუსეთმა სრულად შეუჩერა დე ფაქტო რესპუბლიკას დაფინანსება. 15 თებერვალს ოკუპირებულ აფხაზეთში „საპრეზიდენტო“ არჩევნებია დაგეგმილი.

უკვე წლებია, სოხუმი ზამთრის პერიოდში ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, ენგურჰესის წყალსაცავში წყლის დაბალ დონეს, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.