ზუგდიდის ბაზარში სააღდგომო სუფრისთვის ვაჭრობა მიმდინარეობს, თუმცა მოვაჭრეების ნაწილი მყიდველების სიმცირეს უჩივის.
ზოგი ამბობს, რომ წინა წელთან შედარებით, მაგალითად, ყველი გაიაფდა, თუმცა დღის განმავლობაში მხოლოდ თითო-ოროლა მომხმარებელი სტუმრობს. ნაწილი კლიენტების სიმცირეს გარევაჭრობას უკავშირებს.

არიან გამყიდველები, რომლებიც განმარტავენ, რომ პროდუქტის ფასი არ შეცვლილა და მყიდველებიც, მით უფრო, სააღდგომოდ, მეტ-ნაკლებად, ჰყავთ.

ბაზრის მომხმარებლებიც ყვებიან, რომ სადღესასწაულო დღეებში, ფასების მიუხედავად, ყველა ცდილობს, რომ ოჯახში შესაბამისი სუფრა ჰქონდეს.

რადიო „ათინათმა“ დღეს ზუგდიდის ბაზარში სხვადასხვა პროდუქტის ფასები იკითხა. სოფლის კვერცხი საშუალოდ 60 თეთრი ღირს, ენდრო - 2 ლარი, პასქის ფასები კი ბაზარში 2 ლარიდან იწყება და 15 ლარამდე ადის, 2 ლარიდან შეუძლიათ მყიდველებს ჯეჯილის შეძენაც.

სულუგუნის ფასი 16 ლარიდან იწყება, შებოლილი ყველის - 20 ლარიდან, ჭყინტის კი 12-დან.

საშუალო ზომის სოფლის ქათმის ფასი 16 ლარიდანაა, ერთი კილოგრამი საქონლის ხორცის კი 23 ლარიდან.

ღომის ფქვილი და ღერღილი 4-4 ლარი ღირს, ერთი კილოგრამი პურის ფქვილი - 2 ლარი.

კიტრი საშუალოდ 3, 50 ღირს, იგივე ფასი აქვს პომიდორს, 1, 50 ღირს ძველი კარტოფილი, ახალი კი - 6 ლარი.

სხვადასხვა ხილის შეძენას კი ზუგდიდის ბაზარში, საშუალოდ, ხუთი ლარიდან შეძლებთ. ვაშლის ფასი 5 ლარიდან იწყება, ისევე, როგორც ბანანის. ატამი და ჭერამი 8 ლარი ღირს, იგივე ფასი აქვს მარწყვსაც. ერთი კილოგრამი მსხალი კი საშუალოდ 7 ლარი ღირს.