ზუგდიდში ვლაქერნის ყოვლადწმინდა ღმრთისმშობლის ხატის სახელობის საკათედრო ტაძრის ეზოში, შობის დღესასწაულთან დაკავშირებით, სასულიერო პირებმა და მრევლმა მსვლელობა 12:00 საათზე დაიწყეს და ქალაქის ცენტრალური ქუჩებისკენ გაემართნენ.
მათ კოსტიუმირებული წარმოდგენით და გალობით მოიარეს ზუგდიდის ბულვარის ტერიტორია.

მრევლს ხელში ბაირაღები ეჭირა და შობის ღამის სხვადასხვა პერსონაჟი განასახიერა, მათ შორის იყვნენ ანგელოზები და მოგვები.

იქ ქართულ ტრადიციულ სამოსში ჩაცმული ადამიანებიც იყვნენ.

ალილოს მონაწილეებს გზად შეძახილებითა და მილოცვებით შეხვდნენ.

მრევლი და სასულიერო პირები თავისუფლების მოედანზე მდებარე ღვთისმშობლის მოზაიკასთან გაჩერდნენ, სადაც სამღვდელოების წარმომადგენლებმა პარაკლისი გადაიხადეს.

ამის შემდეგ მეალილოები ივერიის ყოვლადწმინდა ღვთისმშობლის სახელობის მშენებარე ტაძარისკენ გაემართნენ.

მსვლელობა საკათედრო ტაძარში დასრულდა. საზეიმო პარაკლისი დეკანოზმა მალხაზ ჭანტურიამ აღავლინა.

მრევლმა ტკბილეული და საჩუქრები შეაგროვა, რომელსაც ტრადიციულად სოციალურად დაუცველ ოჯახებს გადასცემენ.

ამავე თემაზე:

7 იანვარს ზუგდიდში საშობაო ალილო გაიმართება