,,ზუგდიდის დამოუკიდებელი ცხოვრების ცენტრი" მიმდინარე წლის აგვისტოდან ახორციელებს პროექტს ,,შეზღუდული შესაძლებლობის მქონე პირებისა და NEET-ახალგაზრდების ციფრული და სამეწარმეო მიმართულებით გაძლიერება".

პროექტის მიზანია მოწყვლადი ახალგაზრდების, მათ შორის შეზღუდული შესაძლებლობის მქონე პირთა და NEET-ების აქტიური მონაწილეობის ხელშეწყობა საქართველოს შრომის ბაზარზე.
მოგეხსენებათ, რომ შშმ პირების და NEET ახალგაზრდების დიდ ნაწილს დასაქმების მიმართულებით მნიშვნელოვანი გამოწვევები აქვთ. ამ გამოწვევების ერთ-ერთი მიზეზი ხშირად არის ტექნოლოგიებზე წვდომის და ციფრული უნარების არქონა. ამ გამოწვევის გათვალისწინებით, პროექტის ფარგლებში სამეგრელო-ზემო სვანეთის რეგიონში შეირჩა 30 ახალგაზრდა, რომლებიც ჩაერთნენ ციფრულ უნარების და ციფრული მეწარმეობის თემებზე ორგანიზებულ ტრენინგებში. ახალგაზრდებს საშუალება აქვთ ტრენინგს დაესწრონ როგორც პირისპირ, ისე ონლაინ ფორმატში. პროგრამა შედგენილია მონაწილეთა საჭიროებების მიხედვით და მოიცავს საბაზისო ციფრული უნარების სწავლებას, რეზიუმესა და სამოტივაციო წერილების შედგენას ელექტრონულად, სხვადასხვა აპლიკაციების გამოყენებას და ციფრული მეწარმეობის საფუძვლებს. ტრენინგში ჩართული პირები აღნიშნავენ, რომ ტრენინგები ტარდება საინტერესოდ, შეძენილი უნარები ზრდის მათ მოტივაციას გახდნენ აქტიური სამუშაოს მაძიებლები.

პროექტის ბოლოს მოხდება ტრენინგებზე წარმატებული მონაწილეების იდენტიფიცირება, ერთმანეთთან დაკავშირება და ციფრული სტარტაპ-იდეების დამუშავებაში მხარდაჭერა. პროექტი აგრეთვე დაეხმარება მონაწილეებს მომზადებული სტარტ-აპ იდეების პროექტებისთვის დაფინანსებების შესაძლებლობებზე ინფორმაციის მოძიებაში.

პოსტი მომზადებულია ევროკავშირის მიერ დაფინანსებული პროექტის „ციფრული და კარიერის მართვის კომპეტენციების გაძლიერება საქართველოში, სომხეთსა და მოლდოვაში მცხოვრები მოწყვლადი ახალგაზრდებისთვის“ ფარგლებში, რომელსაც ახორციელებს ორგანიზაცია “კოალიცია დამოუკიდებელი ცხოვრებისთვის” ჩეხეთის რესპუბლიკის კარიტასთან ერთად. პროექტის მიზანია საქართველოში, სომხეთსა და მოლდოვაში მცხოვრები მოწყვლადი ახალგაზრდების, მათ შორის, შეზღუდული შესაძლებლობის მქონე პირების, დასაქმების და მეწარმეობის შესაძლებლობების გაუმჯობესება.