ზუგდიდის პირველი საჯარო სკოლის მასწავლებელმა ხათუნა ქვარცხავამ მის მიერ სოციალურ ქსელში გამოქვეყნებულ სტატუსთან დაკავშირებით ჟურნალისტებთან ისაუბრა. პედაგოგის განმარტებით, პოსტი, რომელიც მან სკოლის კურსდამთავრებულებს მიუძღვნა, მოსწავლეებთან წარსულში დაკავშირებულ "პატარა წყენას" უკავშირდება. 

"არც მიფიქრია, რომ ამხელა რამე მოყვებოდა ამას. იმ წუთს რაც ვიფიქრე, წყენა რაც გამახსენდა, მხოლოდ ეს დავაფიქსირე. ვნანობ რა თქმა უნდა, რახან ასე გამოვიდა. ჩემი მხრიდან არ ყოფილა სწორი. ნამდვილად ეს არ მიფიქრია, ამაზე რომ მეფიქრა და რაღაცა გამეაზრებინა, რა თქმა უნდა არ დავწერდი. 25 წელია ამ სკოლაში ვმუშაობ, არც ერთი მსგავსი სიტუაცია არ მომხდარა. მე მიყვარს ჩემი საქმე და ვემსახურები მთელი გულით, მთელი არსით. პატარა წყენა იყო, რომელიც რამდენიმე წლის წინ მოხდა და ცუდად გამახსენდა. ეს არ იყო რამე მნიშვნელოვანი, მაგრამ ცუდად მომაგონდა. მხოლოდ ამიტომ დავდე. სხვა დანარჩენს ახლა იძიებს შესაბამისი კომისია, გააკეთებენ ალბათ დასკვნებს, მჯერა რომ ყველაფერი კარგად იქნება, რადგან მართლა მიყვარს ჩემი მოსწავლეები, სკოლა და არანაირ ბავშვების დაყოფას არ აქვს ადგილი, ჰკითხეთ ნებისმიერ მოქმედ თუ ყოფილ მოსწავლეს", - აღნიშნა მან. 

ფეისბუქ სტატუსში, რომელიც ხათუნა ქვარცხავამ 2 დღის წინ გამოაქვეყნა ნათქვამი იყო, რომ ის სიხარულს განიცდის იმის გამო, რომ ახალ სასწავლო წელს გარკვეული მოსწავლეების ნახვა აღარ მოუწევს. პედაგოგი წერდა, რომ ზოგიერთი მათგანის სახელი და გვარის ხსენებაც კი ზარავს. 

პოსტი, რომელმაც სოციალური ქსელის მომხმარებლებსა და კურსდამთავრებულებში აღშფოთება გამოიწვია ამ დროისთვის მასწავლებლის გვერდზე არ იძებნება.

პირველი საჯარო სკოლის დირექტორის ნინო გოგინავას განმარტებით, აღნიშნულ საკითხს სამეურვეო საბჭო და დისციპლინური კომიტეტი განიხილავენ, რის შემდეგაც შესაბამის გადაწყვეტილებას მიიღებენ. 

ამავე თემაზე: 

ზუგდიდელი მასწავლებელი კურსდამთავრებულებზე: ზოგიერთის სახელის ხსენება მზარავს