საქართველოს სასწავლო ცენტრის (GLC) ზუგდიდის განყოფილების მე-12 კლასის მოსწავლეებისთვის დღეს ბოლო ზარი დაირეკა.
![](/images/temp/2024/05/17/3fc2c60b5782f641f76bcefc39fb2392.jpg)
სკოლის სივრცეში წლევანდელმა კურსდამთავრებულებმა ტრადიციული გამოსამშვიდობებელი ღონისძიება გამართეს, რომელსაც მასწავლებლები, მშობლები, მოსწავლეები და მათი ახლობლები დაესწრნენ.
![](/images/temp/2024/05/17/ccc36675ce8d7286aff56ecccb53d0a5.jpg)
მოსწავლეები რადიო
„ათინათთან“ ამბობენ, რომ მათთვის სკოლა საუკეთესო მოგონებებსა და პიროვნულად ჩამოყალიბებისთვის მნიშვნელოვან ეტაპს უკავშირდება, რაც მათი თქმით, ზარის დარეკვასთან ერთად, დასრულდა.
![](/images/temp/2024/05/17/7a2347d96752880e3d58d72e9813cc14.jpg)
მეორეს მხრივ, მოსწავლეები განათლების მიღების ახალ ეტაპს ამაღლებული განწყობით ხვდებიან.
![](/images/temp/2024/05/17/959ab9a0695c467e7caf75431a872e5c.jpg)
„მინდა წარმატებები ვუსურვო ყველას, ვინც წელს ამთავრებს სკოლას. ეს საუკეთესო გრძნობების ერთობლიობაა, თან გწყინს, რომ ტოვებ GLC-ის სივრცეს, თუმცა, ამავდროულად, ძალიან ბედნიერი ხარ, რადგან მომავლისთვის შენი გზა გახსნილია. მიხარია და მადლობელი ვარ, რომ ჩემი კლასელები გავიცანი და მაჩუქა ამ სკოლამ“, - თქვა GLC-ის კურსდამთავრებულმა მარიამ ხუბუამ.
![](/images/temp/2024/05/17/cc598895a76714dff4c34b2361569b37.jpg)
„ჩვენს ცხოვრებაში ძალიან დიდი ნაბიჯი გადავდგით. გადავედით ცხოვრების შემდეგ ეტაპზე, რაც ცოტა რთულია, რადგან ვტოვებ ძალიან საყვარელ მასწავლებელს, მაგრამ მეორეს მხრივ, ბედნიერი ვარ, რომ გავიზარდე და ვხვდები, უფრო მეტი მელის წინ“, - აღნიშნავს ჩვენი რესპონდენტი გიორგი შელია.
![](/images/temp/2024/05/17/2156795824e042092b04e970977114cd.jpg)
ამავე სკოლის ქართული ენისა და ლიტერატურის მასწავლებელის რუსუდან კაკაჩიას თქმით, მიუხედავად ბოლო ზარის ყოველწლიური კანონზომიერებისა, მასწავლებლებისთვის ეს დღე ემოციურად დატვირთულია.
![](/images/temp/2024/05/17/a01a0380ca3c61428c26a231f0e49a09.jpg)
„ვღელავთ იმიტომ, რომ ჩვენი კურსდამთავრებულები ახალ ეტაპზე გადადიან. შესაბამისად, განშორების სევდით არის დატვირთული დღევანდელი დღე, თუმცა წრფელი სიყვარულით ვულოცავთ მომავლის გზას. სკოლამ თავის მხრივ, ლიდერულთან ერთად, პიროვნული თვისებებიც ჩამოუყალიბა მათ. ეს იქნება კრიტიკული თაობა და ვიმედოვნებთ, რომ ისინი ღირსეულ სიტყვას იტყვიან მომავლის წინაშე და ღირსეულად გააგრძელებენ მამულის სვლას, როგორც ამას ქადაგებდნენ კლასიკოსები და ქვეყნის პროგრესული წარმომადგენლები“, - გვეუბნება ის.
![](/images/temp/2024/05/17/7bd28f15a49d5e5848d6ec70e584e625.jpg)
წელს GLC-ის ზუგდიდის განყოფილებას ცხრა მე-12 კლასელი დაემშვიდობა.
მასალის გამოყენების პირობები