სახელმწიფო უსაფრთხოების სამსახურის უფროსმა, გრიგოლ ლილუაშვილმა, პარლამენტში, სუს-ის 2023 წლის ანგარიშის წარდგენისას, რუსეთის მიერ ოკუპირებულ ტერიტორიაზე უკანონო პატიმრობაში მყოფი საქართველოს მოქალაქეების შესახებ ისაუბრა.

მან დაადასტურა აფხაზი ბლოგერის, სარა ჩამაგუას მიერ ტელეგრამის არხებზე გავრცელებული ინფორმაცია, საქართველოს მოქალაქის ასმათ თავაძის გათავისუფლების შესახებ.

„სხვათა შორის ქალბატონი [ასმათ] თავაძის გათავისუფლება მოხდა მიმდინარე წელს“, - თქვა გრიგოლ ლილუაშვილმა.

მანამდე, ჩამაგუა წერდა, რომ თავაძე ქართულ მხარეს "აფხაზეთის მოქალაქის ლეილა დ"- ს მონაწილეობით გადასცეს. 

დე ფაქტო სამართალდამცავმა ორგანოებმა ასმათ თავაძე 2022 წლის ნეომბერში დააკავეს, "მას ნარკოტიკული ნივთიერებების შეძენა-შენახვას ედავებოდნენ“.

ასმათ თავაძე, ოკუპირებულ აფხაზეთში უკანონო პატიმრობაში მყოფი საქართველოს კიდევ ორ მოქალაქესთან, ირაკლი ბებუასთან და ქრისტინე თაკალანძესთან ერთად, მოხსენიებული იყო საქართველოს სახალხო დამცველის 2023 წლის ანგარიშში ადამიანის უფლებების მდგომარეობის შესახებ.

ამჟამად ოკუპირებულ აფხაზეთში უკანონო პატიმრობაშია საქართველოს ორი მოქალაქე: ქრისტინე თაკალანძე, რომელსაც ოკუპირებული აფხაზეთის ე.წ. უზენაესმა სასამართლომ 10 წლითა და 6 თვით პატიმრობა მიუსაჯა "ჯაშუშობის" ბრალდებით და ირაკლი ბებუა, რომელიც დე ფაქტო სასამართლომ "სახელმწიფო სიმბოლიკის შეურაცხყოფის", "სხვისი ქონების განზრახ დაზიანების" და "საბრძოლო მასალის უკანონოდ შენახვის" მუხლებით გაასამართლა და 2020 წლის 7 დეკემბერს 9 წლით თავისუფლების აღკვეთა მიუსაჯა.