რუსული კომპანია Aero Management - ი (ყოფილი ს.ს. Dart) აფხაზეთის დე ფაქტო რესპუბლიკის ე.წ. მთავრობისგან 240 მილიონ რუბლზე მეტის (2,8 მილიონ დოლარზე მეტი) გადახდას ითხოვს.

ტელეგრამის არხმა RESPUBLICA - მ კომპანიის გენერალური დირექტორის ფილიპ მიზონოვის წერილი გამოაქვეყნა, რომლის ადრესატებიც არიან ეკონომიკის „მინისტრი“ ქრისტინა ოზგანი და სოხუმის აეროპორტის გენერალური დირექტორის მოვალეობის შემსრულებელი ბ.ჯენია.

„ეხო კავკაზას“ თანახმად, დოკუმენტით, კომპანია სოხუმის აეროპორტის რეკონსტრუქციის პროექტის განსახორციელებლად დაიქირავეს და მასთან 2022 წელს არაერთი ხელშეკრულება დაიდო.

”ინვესტორმა კეთილსინდისიერად შეასრულა თავისი ვალდებულებები, რისთვისაც მან აეროპორტის რეკონსტრუქციის საპროექტო-სააღრიცხვო დოკუმენტაციის შემმუშავებელზე გადაცემის პირობით 120 მილიონი რუბლის ოდენობის სესხი გასცა ”, - ნათქვამია დოკუმენტში.

ინვესტორი მიუთთებს, რომ „სესხის დავალიანების დაფარვისა და სააგენტოს საკომისიოს გადახდის“ ვალდებულებები ჯერ არ არის შესრულებული.

„უფრო მეტიც, აფხაზეთის ენერგეტიკის სამინისტროს ქმედებების შედეგად, ინვესტორს ჩამოერთვა ფაქტიური შესაძლებლობა მონაწილეობა მიიღოს აეროპორტის რეკონსტრუქციის პროექტში, ამ პროექტში სხვა ინვესტორის ჩართვის გამო“, - ნათქვამია დოკუმენტში.
ინვესტორი ითხოვს დავალიანების დაფარვას და სესხის თანხის (120 მილიონი რუბლის ოდეობით) დაბრუნებას, ასევე პირგასამტეხლოების და სააგენტოს საკომისიოების გადახდას.

კომპანია გამოდის წინადადებით, მხარეებს შორის გაიმართოს თათბირი და დარეგულირდეს დავალიანების საკითხები.

სოხუმში რუსული კომპანიის მოთხოვნასთან დაკავშირებით, კომენტარი ჯერჯერობით არ გაუკეთებიათ.

აღსანიშნავია, რომ სააქციო საზოგადოება Aero Management (ყოფილი ს.ს. Dart) 2021 წელს შეიქმნა. კომპანიის საწესდებო კაპიტალი 10 ათასი რუბლია, ძირითადი საქმიანობაა კონსულტაცია კომერციულ საქმიანობასა და მენეჯმენტზე. 2022 წლის დეკემბრის ბოლოს, მედიამ გამოაქვეყნა დარტის გენერალური დირექტორის მრჩევლის დიმიტრი ნემოვის კომენტარი, რომელიც საუბრობდა „აეროპორტის მშენებლობისთვის სამართლებრივ სამზადისზე“.

2023 წლის ოქტომბერში ცნობილი გახდა, რომ ოკუპირებული აფხაზეთის ე.წ. მთავრობამ ხელი მოაწერა ხელშეკრულებას სოხუმის აეროპორტის რეკონსტრუქციის შესახებ, შპს "ინფრასტრუქტურის დეველოპმენტთან", რომლის ერთადერთი მფლობელია რუსეთის შინაგან საქმეთა სამინისტროს ყოფილი ხელმძღვანელის, ამჟამად კი რუსეთის უშიშროების საბჭოს მდივნის პირველი მოადგილის, რაშიდ ნურგალიევის ერთ - ერთი ვაჟი, რაშიდ ნურგალიევი.

რუსეთის ეკონომიკური განვითარების მინისტრის მოადგილემ დიმიტრი ვოლვაჩმა განაცხადა, რომ პროექტში ინვესტიციების მოცულობა 12 მილიარდ რუბლს გადააჭარბებს. მისივე თქმით, რუსეთიდან სოხუმის აეროპორტის მიმართულებით პირველი საცდელი რეისი წელს იგეგმება.

უფრო ადრე, ტელეგრამის არხი REPUBLIKA იტყობნებოდა, რომ სოხუმის აეროპორტის რეკონსტრუქციის სამუშაოები გრაფიკს ჩამორჩა, ამასთან ერთად, არ შედგა საცდელი რეისი, რომელიც 20 ივლისს იყო დაგეგმილი.
მანამდე, ასლან ბჟანია აცხადებდა, რომ რომ ბაბუშარას აეროპორტი 2024 წლის ბოლოს გაიხსნება, მიუხედავად იმისა, რომ აეროპორტის აღდგენის პროექტს სამოქალაქო ავიაციის საერთაშორისო ორგანიზაცია (ICAO), საქართველო და ევროკავშირის ქვეყნები ბლოკავენ.