აფხაზური ტელეგრამ არხების Respublica - ს და „აფხაზური პორტალის“ ინფორმაციით, თვითგამოცხადებული რესპუბლიკის პრეზიდენტმა ასლან ბჟანიამ რუსეთის ფედერაციის ვიცე-პრემიერ ალექსანდრ ნოვაკთან შეხვედრაზე „აპარტამენტების კანონის" მოწინააღმდეგე ე.წ. დეპუტატებისთვის რუსეთის მოქალაქეობის ჩამორთმევის საკითხი განიხილა.
ამავე ცნობით, შეხვედრის ოქმის მიხედვით, მოსკოვი გეგმავს 2024 წლის 1 სექტემბრიდან შეაჩეროს სოხუმისთვის ფინანსური დახმარების გაწევა, სანამ აფხაზური მხარე არ შეასრულებს შემდეგ ვალდებულებებს:

- ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ შეთანხმების რატიფიცირება;

— რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ შეთანხმების ძალაში შესვლის უზრუნველყოფა;

— რუს ინვესტორებზე შეზღუდვების მოიხსნა კომერციული უძრავი ქონების ბაზარზე (ბინები).

გარდა ამისა, მოსკოვი აპირებს მოუწოდოს სახელმწიფო სათათბიროს და ფედერაციის საბჭოს, მინიმუმამდე დაიყვანონ კონტაქტები „აფხაზეთის პარლამენტის დეპუტატებთან რუსეთის წინაშე ვალდებულებების შესრულების არაკონსტრუქციული პოზიციის გამო“.

ე.წ. პრეზიდენტის ადმინიტრაციის ცნობით, ბჟანია - ნოვაკის შეხვედრა 23 აგვისტოს შედგა. პრესრელიზში ნათქვამია, რომ მხარეებმა განიხილეს „აფხაზეთის რესპუბლიკის სოციალურ-ეკონომიკური განვითარების, საინვესტიციო ურთიერთქმედების, ენერგომომარაგების არაერთი საკითხი“. 

აფხაზეთის დე ფაქტო რესპუბლიკის “პარლამენტის“ ეკონომიკური პოლიტიკისა და რეფორმების კომიტეტმა “აპარტამენტების” შესახებ კანონპროექტი 17 ივლისს მოიწონა.

მისი განხილვა კანონპროექტის კრიტიკოსების პროტესტის ფონზე მიმდინარეობდა, აქციები გაიმართა სოხუმსა და ოჩამჩირეში.  

აფხაზეთის დე ფაქტო რესპუბლიკის ე.წ. პარლამენტმა 25 ივლისს უკან გაიწვია „აპარტამენტების“ შესახებ კანონპროექტი.

დოკუმენტი გალის, ოჩამჩირის და ტყვარჩელის რაიონებში 10 ათასამდე ბინის მშენებლობას ითვალისწინებდა. "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი აფხაზი ლიდერი ასლან ბჟანიაა. ის აქტიურად ლობირებდა მას.

ინფორმაციისთვის, აფხაზეთის დე ფაქტო რესპუბლიკის ე.წ. პარლამენტმა 2023 წლის 27 დეკემბერს, გამთენიისას, მოახდინა ბიჭვინთის აგარაკების შესახებ შეთანხმების რატიფიცირება, იმავე დილას, ე.წ. პრეზიდენტმა ასლან ბჟანიამ "პარლამენტის" მიერ მიღებულ კანონებს ხელი მოაწერა და დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.

გასული წლის ოქტომბერში ბჟანიამ განაცხადა, რომ ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსება იგეგმება.