სენაკის რაიონულ სასამართლოში ბალდელი აქტივისტების საჩივარი, რომელიც კანიონის იჯარის წესით გასხვისებას ეხება, მოსამართლის გადაწყვეტილებით, გადაიდო. ამის შესახებ რადიო "ათინათს" მოძრაობის "ბალდის კანიონის შესანარჩუნებლად" წევრმა ცოტნე თვარაძემ უთხრა.

მისი თქმით, სასამართლო პროცესი, რომელზეც მომჩივანი მხარე კანიონის საკითხის განხილვაში გარემოსდაცვითი ექსპერტის ჩართვას ითხოვდა, დაახლოებით, 10 წუთი გაგრძელდა.

"მოპასუხე მხარემ ითხოვა 10 დღიანი ვადა, რაც სასამართლომ დაადასტურა. საინტერესოა, რომ მოსამართლე, ვინც ამ პროცესს უძღვება, ჩვენს სხვა საქმეებსაც განიხილავს, რომლებიც სისხლის სამართლის საქმეებია. სამოქალაქო და სისხლის სამართლის საქმეებს, ერთი მოსამართლე განიხილავდეს, ეს ცოტათი უცნაურია", - ამბობს თვარაძე.

ის განმარტავს, რომ კანიონზე მშენებლობა ადგილობრივი მოსახლეობის ინტერესების გათვალისწინებით უნდა მოხდეს. როგორც ის ამბობს, ეს უფლებები საქართველოს კონსტიტუციით არის გარანტირებული და დაცული ტერიტორიების წინააღმდეგ შეტანილი საჩივარიც სწორედ ამას ეფუძნება.

მარტვილის მუნიციპალიტეტის სოფელ ბალდაში, კანიონი, რომელიც ბუნების ძეგლია, აუქციონის წესით, 20 - წლიანი საკუთრების უფლებითა და გარკვეული ვალდებულებებით კომპანია "კანიონ 350"-ს გადაეცა.

თვეებია, ბალდელების ნაწილი სამუშაოების შეჩერებას ითხოვს და კანიონის გასხვისებას უკანონოს უწოდებს.

სახელმწიფო უწყებაში განმარტავენ, რომ ყველა სახის სამუშაო კანონის სრული დაცვით მიმდინარეობს. კომპანიამ ორი წლის განმავლობაში 3 მილიონ ლარამდე ინვესტიცია უნდა განახორციელოს, მომდევნო 3 წლის ვადაში კი ბუნების ძეგლზე მოაწყოს ეკოტურისტული ინფრასტრუქტურა - ვიზიტორთა ცენტრი, როლერი ატრაქცია, კიდული ბილიკი და საფეხმავლო ბილიკი.

ინფრასტრუქტურული სამუშაოები 2023 წლის აპრილის თვიდან დაიწყო. პროექტის დაწყებამდე კი შეისწავლეს ბუნების ძეგლის გეოლოგიური,ჰიდროლოგიური კომპონენტი, რათა ბუნების ძეგლზე ინფრასტრუქტურის მოწყობა უსაფრთხო ყოფილიყო.


ამავე თემაზე: 

დღეს ბალდის კანიონზე მშენებლობის მოწინააღმდეგის სასამართლო პროცესზე მოწმეები დაკითხეს

სასამართლომ ბალდის კანიონზე მშენებლობის მოწინააღმდეგე პატიმრობაში დატოვა

"ბალდის კანიონის შესანარჩუნებლად" მოძრაობის წევრის სასამართლო პროცესი დღეს გაიმართება

ბალდის კანიონის ტერიტორიაზე ექსპერტთა ჯგუფი არ შეუშვეს - დაცული ტერიტორიების სააგენტო

ბალდის კანიონის იჯარის წესით გასხვისების საწინააღმდეგო სარჩელს სასამართლოში შეიტანენ

სოციალური სამართლიანობის ცენტრმა ბალდის კანიონთან დაკავშირებით სასამართლოს მიმართა