აფხაზეთის თვითგამოცხადებულ რესპუბლიკის „სახელმწიფო უსაფრთხოების სამსახურის“ ინფორმაციით, მათ დააკავეს დრონი, რომელიც „საქართველოს ანტისაოკუპაციო მოძრაობის" ლიდერს, დავით ქაცარავას ეკუთვნის. ამავე ცნობით, ინციდენტი, 16 ოქტომბერს მოხდა.

განცხადებაში აღნიშნულია, რომ დე ფაქტო სუს - ის და რუსეთის ფედერალური უსაფრთხოების სამსახურის სასაზღვრო სამმართველოს თანამშრომლებმა, გალის რაიონის სოფელ მეორე ოტობაიაში დააფიქსირეს Mavic 3 მოდელის დრონი, რომელიც „მიმდებარე ტერიტორიებისა და სამხედრო ობიექტების გადაღებას ახორციელებდა“. მათივე ცნობით, მათ უპილოტო საფრენი აპარატი ჩამოაგდეს.

თავად დავით ქაცარავამ მანამდე სოციალურ ქსელში დაწერა, რომ მისი დრონი პატრულირების დროს ჩამოაგდეს და ახლის შესაძენად თანხის შეგროვების შესახებ გამოაცხადა.

„ეხო კავკაზას“ თანახმად, მომხდართან დაკავშირებით, „აფხაზეთის სახალხო ფრონტის“ პოლიტსაბჭომ გააკეთა განცხადება, რომელშიც აღნიშნულია, რომ „მსგავსი ინციდენტები პროვოკაციას წარმოადგენს“, რომელიც მიმართულია „აფხაზეთ-საქართველოს საზღვარზე“ სიტუაციის დესტაბილიზაციისკენ.

მათ შეშფოთება გამოთქვეს, „რეგიონში მოქმედი უცხოური სადამკვირვებლო მისიების უმოქმედობით“.