დღეს, ანაკლიის ღრმაწყლოვანი ნავსადგურის ინფრასტრუქტურის მშენებლობის დაწყების ღონისძიება გაიმართა, რომელსაც საქართველოს პრემიერ-მინისტრი ირაკლი კობახიძე, ეკონომიკისა და მდგრადი განვითარების მინისტრი ლევან დავითაშვილი და ხელისუფლების სხვა წარმომადგენლები დაესწრნენ.

შეხვედრაზე ეკონომიკის მინისტრმა და პორტის ინფრასტრუქტურის მშენებელი ბელგიური კომპანიის “Jan De Nul”-ის ჯგუფის დირექტორმა ხელი მოაწერეს თანამშრომლობის მემორანდუმს.

„პროექტის პირველი ფაზა მოიცავს 600 000 კონტეინერს. პირველ ეტაპზე, ჩვენ ავითვისებთ დაახლოებით 85 ჰა ტერიტორიას. საბოლოოდ, 9 ფაზის დასრულების შემდეგ ვიცით, რომ პროექტი ხორციელდება რამდენიმე ეტაპად. ჩვენ, საბოლოოდ მოვიცავთ 400 ჰა-მდე ტერიტორიას და დამატებით გვექნება სამრეწველო თავისუფალი ეკონომიკური ზონის განვითარების პროექტი, რომელიც ასევე მოიცავს დამატებით 600 ჰა ტერიტორიას. აქ იქნება მნიშვნელოვანი ეკონომიკური სამრეწველო, საწარმოო, სავაჭრო აქტივობები, რომელიც, რა თქმა უნდა, მნიშვნელოვანი დასაქმების წყარო იქნება რეგიონისთვის“, - თქვა ეკონომიკის მინისტრმა.

ცნობისთვის, Jan De Nul-მა მიმდინარე წლის სექტემბერში ანაკლიის ღრმაწყლოვანი ნავსადგურის აკვატორიის ფსკერის დაღრმავებით და ტალღისმჭრელის პროექტირების მოსამზადებელი სამუშაოები დაიწყო.

რაც შეეხება პარტნიორ კომპანიას და ჩინურ კონსორციუმთან თანამშრომლობას, საქართველოს ეკონომიკისა და მდგრადი განვითარების მინისტრის ლევან დავითაშვილმა სექტემბერში განაცხადა, რომ ეს პორტის ინფრასტრუქტურის მშენებლობის პარალელური პროცესია და კომპანიასთან მოლაპარაკებებში ბევრი მიმართულებით პოზიციები დაახლოვდა.

აშშ-ის სახელმწიფო დეპარტამენტის განმარტებით, შერჩეული ჩინური კომპანია ამერიკის მთავრობამ სამხედრო, სადაზვერვო-კვლევით საქმიანობაში, იარაღისა და სამხედრო აღჭურვილობის წარმოების განვითარებაში ამხილა. მათი განმარტებით, კონსორციუმს აქვს თაღლითობასა და კორუფციაში მონაწილეობის ისტორიაც.

შეგახსენებთ, 2025 წლის სახელმწიფო ბიუჯეტის პირველადი პროექტის მიხედვით, ანაკლიის ღრმაწყლოვანი პორტისთვის საჭირო წყლის ინფრასტრუქტურის მშენებლობა 150 მლნ ლარით დაფინანსდება.


ამავე თემაზე: 

პორტის პროექტირებისთვის ადგილზე სხვადასხვა სამუშაო დაიწყო - ანაკლიის საზღვაო ნავსადგური

2025 წლის ბიუჯეტის პროექტით, ანაკლიის ღრმაწყლოვანი პორტისთვის 150 მლნ ლარია გამოყოფილი

ანაკლიის პორტის პროექტი გეგმაზომიერად მიმდინარეობს, შეფერხების გარეშე - მინისტრი

ანაკლიის პორტის ინფრასტრუქტურის მშენებლობაზე ხელშეკრულება “Jan De Nul”-თან გაფორმდა

კომპანია „Jan De Nul Group“-თან ხელშეკრულების შესახებ მოლაპარაკებები აგვისტოს ბოლომდე დასრულდება - „ანაკლიის საზღვაო ნავსადგური“

ანაკლიის ღრმაწყლოვანი პორტი ჩინეთმა არ უნდა ააშენოს - აშშ-ის სახელმწიფო მდივნის მოადგილე

ანაკლიის პორტის ხარისხიანი განვითარებისთვის ბევრი პარტნიორისგან შემდგარი კონსორციუმი ითანამშრომლებს სახელმწიფოსთან - მინისტრი