სადამკვირვებლო კოალიციამ "ჩემი ხმა" 29 საარჩევნო ოლქში წარადგინა საჩივრები 246 საარჩევნო უბნის შედეგების ბათილობის მოთხოვნით. ამის შესახებ ორგანიზაციის წარმომადგენელმა ლონდა თოლორაიამ ბრიფინგზე განაცხადა.

მისი თქმით, აღნიშნულ უბნებზე რეგისტრირებულ ამომრჩეველთა რაოდენობა 417 305-ია.

ორგანიზაციამ არჩევნების შედეგების ბათილად ცნობა მოითხოვა ზუგდიდის - 4, სენაკის - 3 და ხობის -1 უბანზეც.

თოლორაიას განმარტებით, იდენტიფიცირებულია ისეთი ხასიათის მძიმე დარღვევები, რომლებიც არჩევნების ფუნდამენტურ პრინციპებს - ფარულობას და ნების თავისუფალ გამოხატვას ეხება.

"არჩევნების დღეს ჩვენი დამკვირვებლების მიერ გამოვლენილ იქნა ხმის მიცემის ფარულობის დარღვევის, სხვის ნაცვლად ხმის მიცემის/განმეორებით ხმის მიცემის, მარკირების შეუმოწმებლობისა და მარკირების გარეშე ხმის მიცემის, უბანზე ფიზიკური და სიტყვიერი თავდასხმის, დაკვირვების განხორციელებაში (განსაკუთრებით ვერიფიკაციის პროცესის დაკვირვებაზე) ხელის შეშლისა და შეუძლებლობის, უბანზე არაუფლებამოსილი აგრესიული პირების ყოფნისა და კომისიის წევრების მხრიდან აგიტაციის ასობით ფაქტი", - აღნიშნავს ის.

სადამკვირვებლო კოალიციის "ჩემი ხმა"- ს დამკვირვებლები საარჩევნო პროცესს მთელი ქვეყნის მასშტაბით გახსნილ 1131 საარჩევნო უბანზე აკვირდებოდნენ.