ოკუპირებულ აფხაზეთში ვადამდელი „საპრეზიდენტო“ არჩევნები, შესაძლოა, 2025 წლის 15 ან 16 თებერვალს ჩატარდეს. ამის შესახებ აფხაზური „ცესკოს“ წევრმა რუსულ „ტასს“ განუცხადა.

„ასლან ბჟანიამ თანამდებობა დატოვა და პარლამენტმა მის გადადგომას მხარი 19 ნოემბერს დაუჭირა, რაც იმას ნიშნავს, რომ კონსტიტუციის თანახმად, არჩევნები უნდა ჩატარდეს სამ თვეში, ანუ 19 თებერვლამდე. გამომდინარე იქიდან, რომ არჩევნები ყოველთვის ტარდება შაბათ -კვირას, ეს შეიძლება იყოს შაბათს, 15 თებერვალს, ან კვირას, 16 თებერვალს, ” - წერს გამოცემა.

ადრე, დე ფაქტო ცესკოს ხელმძღვანელმა, დიმიტრი მარშანმა განაცხადა, რომ არჩევნების მომზადება „პარლამენტის“ მიერ მათი თარიღის დანიშვნისთანავე დაიწყება:

”თუ მანამდე, მომდევნო არჩევნების ჩატარება თებერვლის ბოლოს ან 2025 წლის მარტში იყო მოსალოდნელი, პრეზიდენტის ვადამდე გადადგომის შემდეგ, ეს თარიღები ოდნავ შეიცვალა ... არჩევნების დანიშვნამდე ორი თვით ადრე, ჩვენ დავიწყებთ საინიციატივო ჯგუფების რეგისტრაციას საპრეზიდენტო კანდიდატების დასახელებისთვის ”, - განმარტა მან.

გადადგომამდე, ასლან ბჟანიამ განაცხადა, რომ „არჩევნებში“ მონაწილეობას მიიღებს. თავისი კანდიდატურის წარდგენას გეგმავს ვეტერანთა ორგანიზაცია "არუაა“, მათი თქმით, ისინი მხარს დაუჭერენ აფხაზური ოპოზიციის ერთ- ერთი ლიდერის ადგურ არძინბას კანდიდატურას. შესაძლოა, კენჭი ასევე იყარონ, საზოგადოებრივი ორგანიზაცია „აიდგილარას“ წარმომადგენელმა კან კვარჩიამ და აფხაზეთში რუსეთის სავაჭრო წარმომადგენლობის ხელმძღვანელმა ოლეგ ბარციცმა.

აფხაზეთის თვითგამოცხადებული რესპუბლიკის “პრეზიდენტი” ასლან ბჟანია თანამდებობიდან 19 ნოემბერს გადადგა.